´óÏó´«Ã½

Tha facal ann a tha ag ràdh gur binn guth an eòin far na rugadh e agus, a rèir a theaghlach, bha sin dha-rìreabh fìor mun fhear air an deach Annella Nicleòid a chèilidh ann a 1991.

Ged a b’fheudar do Dhòmhnall Iain MacFhillinnein, Dòmhnall Iain Dhòmhnaill Dròbhair, Càrlabhagh fhagail ‘s gun e ach dà bhliadhna dheug, cha do chaill e a-riamh an dàimh a bh’ aige ris a’ bhaile neo na daoine.

Rugadh Dòmhnall Iain am Mullach Chàrlabhaigh air 6 Cèitean 1904, an duine bu shine de chòignear a theaghlach a bh’ aig Dòmhnall Dròbhair agus a bhean Anna cuideachd à Mullach Chàrlabhaigh. Ach, gun Dòmhnall Iain ach 12, bhàsaich an athair ‘s am mhàthair. B’ fheudar an uair sin dha fhèin, a pheathraichean agus a bhràithrean beaga a dhol a dh’fhuireach còmhla ri càirdean fa leth ann a Steòrnabhagh. A dh’aindeoin sin cha do chaill iad a-riamh an ceangal a bh’ aca ri chèile neo aigesan ri Càrlabhagh.

Cha robh cùisean furast’ agus cha robh càil air a shon aig aois 14 ach a dhol a dh’obair, agus cha robh oisean dhen a’ bhaile air nach e mion-eòlach. A seo tha e ag innse do dh' Annella mu na h-obraichean a bh' aige agus a' ruith air a h-uile bùth, a' dèanamh dealbh air Steòrnabhagh bho chionn 100 bliadhna, mar a bha dha fhaicinn cho soilleir ann a sùil na cuimhne.