´óÏó´«Ã½

B’ e a chuid seinn agus na h-òrain à dualchas Uibhist a Tuath a bh’ aig Ùisdean MacMhathain a ghlac aire Jo NicDhòmhnaill an toiseach, agus air cuairt a dh’ Uibhist a Tuath bha i ro thoilichte cothrom fhaighinn a dhol a chèilidh air Ùisdean agus a bhean Màiri nan dachaigh anns na h-Àrdaibh sa Bhaile Shear. ’S iomadh duine a chur Ùisdean na h-aithne às dèidh sin, daoine mar e fhèin, aig an robh ùidh ann an eachdraidh is dualchas agus òrain is obair nàdair.

Rugadh Ùisdean Sheumais Bhàin ann an 1920 agus, nuair a bha e òg sna h-Àrdaibh, bha e ag obair air croit athar agus thug e greis aig togail an ràthaid mhòir. Thog e mòran òrain bho mhàthair, bho sheanair - Aonghas na Càrnaich - agus bho dhaoine mar Ruaraidh MacÀidh, Bàrd Iollaraigh. Phòs e Màiri NicBheathain ann an 1946 agus còig bliadhna an dèidh sin ghluais e fhèin agus an teaghlach suas a dh’Àisgearnais ann an Uibhist a Deas is e air obair fhaighinn aig an oighreachd.

Ann an 1960 ghluais Ùisdean ’s a theaglach – bha sianar chloinne aige fhèin is Màiri – air ais a dh’Uibhist a Tuath, a dh’fhuireach ann a Langais is Ùisdean a’ dol a dh’ obair na gheamair aig an Iarla Granville, a bha air oighreachd Uibhist a Tuath a cheannachd.

A seo tha Ùisdean ag innse do Jo mun obair a bh' aige air na h-oighreachdan agus mu na daoine ris na choinnich e.