´óÏó´«Ã½

Anns an t-seirbheis cluinnidh sibh na sailm agus an leughadh a leanas:

Salm 57: 1-2 air fonn Martyrdom agus ‘s e Calum MacFhearghais a tha os cionn na seinn le taic bho choitheanal Seamanaraidh na h-Eaglaise Saoire ann an Steòrnabhagh.

Salm 68: 18-19 air fonn Bangor agus ‘s e an t-Urr Niall Seathach a tha os cionn na seinn le taic bho choitheanal Eaglais Shaor a’ Chaoil ‘s a Ghearasdan

Leughadh: Salm 30
Ceann-teagaisg: Salm 30: 1

Rugadh an t-Urr Donnchadh MacLeòid ann an Càrlabhagh ann an 1954. Chaidh oideachadh ann am Bun-sgoil Chàrlabhaigh, ann an Sgoil MhicNeacail agus ann an Oilthigh Obar Dheathain mus deach e a-steach airson na ministrealachd.

Na òige ann an Càrlabhagh, 's e glè bheag de Bheurla a bh' aige. Ri chuimhne fhèin, 's e na ciad fhacail Bheurla a thuirt e nuair a bha e anns an sgoil, "Please Miss, may I leave the room?"

Bha, agus tha, ùidh mhòr aig Donnchadh anns a' chànan agus anns a' chultar agus 's e obair neach-teagaisg Gàidhlig a' chiad obair a bh' aige às dèidh ceumnachadh à Oilthigh Obar Dheathain. Bha e a' teagasg airson ùine an Uibhist ann an sgoiltean Dhalabroig agus Phaibeil. Chaidh Donnchadh air ais dhan cholaiste ann an 1980 - an turas seo gu Colaiste na h-Eaglaise Saoire airson dreuchd ministeir a thoirt a-mach.

Chaidh a phòsadh ris a' chiad choitheanal aige ann an 1983 ann am Bun Ilidh agus bha e an sin gu 1996 nuair a chaidh a phòsadh ri coitheanal Eaglais Shaor Pheairt, far an robh e airson mu chòig bliadhna deug. Ann an 2011 chaidh Mgr MacLeòid a phòsadh ri coitheanal Eaglais Shaor Dhòrnaich gus an do leig e dheth a dhreuchd ann an 2021. Bha e cuideachd airson deich bliadhna na fhear-deasachaidh air Colbh Ghàidhlig iris mhìosail na h-eaglaise, The Monthly Record.

Tha ùidh mhòr mhòr aige ann am ball-coise agus gu sònraichte ann an sgioba ball-coise Partick Thistle. Tha e pòsta aig Mòrag à Sgalpaigh agus tha triùir a theaghlach aca agus cuideachd dithis oghaichean.

Show less