´óÏó´«Ã½

Tha Aonghas Iain MacIllEathain, neo Aonghas Iain Kong mar is fhèarr a dh’aithnichear e sa sgìre aige fhèin, ann an còmhradh ri Maureen NicLeòid mu bheatha. Niseach a th' ann gu cinnteach ach fear cuideachd a chuir a chasan air tìr ann am iomadach ceàrnaidh dhen t-saoghal tro bheatha obrach. Thairis air an t-sreath ghoirid seo cluinnidh sinn mu na h-àitichean air na thadhail e tro obair ann an gnìomhachas na h-ola agus an t-eòlas a chuir e air a’ ghnìomhachas agus air na daoine. Ach aig deireadh an latha, cha robh càil cho tarraingeach nuair a leig e dheth a dhreuchd na machraichean, lotaichean is othaisgean Nis.

Thuige seo tha sinn air cluinntinn mar a dhèilig e fhèin gu pearsanta ri tubaist a’ chlàr òla, Piper Alpha, an tubaist bu mhotha a bha sa Chuan a Tuath agus a’ bhuaidh a bh’ aig na thachair air gnìomhachas na h-ola agus sàbhailteachd sa Chuan a Tuath. Chuala sinn mu thachartasan eile san àit' obrach aige, ann an In Amenas an Algeria agus an taic a thug e fhèin dhaibh le a chuid eòlais ged a bha e air a' sgìre fhàgail aig an àm.

Anns a' phrògram mu dheireadh tha sinn a' cluinntinn mun ùine a chuir e seachad ann am Brazil. Às dèidh bliadhnaichean a' coimhead às dèidh an dachaigh agus an teaghlach, 's a' chlann a-nise air fàs suas agus air an dachaigh fhàgail, tha bean Aonghais Iain, Cairistìona, air co-dhùnadh mòr a dhèanamh agus air a cùl a chur ri tràighean is cladaichean Nis, agus air a dhol cuide ris fhèin airson beatha às ùr, airson greiseag co-dhiù, ann am Brasil.