大象传媒

An Nowodhow - Sunday 7 January 2018
Gorthugher da, ha Bledhen Nowydh da ha dynnargh dhe dhyllans a'n seythen ma 'An Nowodhow' war 大象传媒 Radyo Kernow.
Tewedh Eleanor re gawsyas damach ha godorrans dres Kernow.An tewedh, hag a frappyas an soth west Dy'Mergher, a arnewas fos an mor dhe Bortreth, pymp bledhen poran wosa damach haval.Owth arhwithra an diwettha damach, Colin Higgs dhyworth Kessedhek Porth Portreth a leveris re godhas kansow a donasow war an tewes a-woles, ha re bia distruys rann fos an porth, ugens meter y hirder.An damach re asas chiow ha diwotti war amal an treth diskudhys hag orth peryl.Onan an teyluyow trigys yn terras diskudhys a fias aga thre a-varr yn myttin wosa gweles diskar an fos.Portreth a vedha porth bysi, owth ynperthi glow hag owth esperthi kober. Lemmyn an dreveglos a unnek kans a dus yw lewys gans touristieth, hag yma chiow golyow, bostiow ha gwerthjiow ynno.Y leveris Lisa Belcher a dhyght an tavern Waterfront, ryb amal an mor:"Yth eson ni kavos seygher tewes dhyworth an soler, rag surhe y hwren hag a yllyn. [...] Pypynag a hwer, ni a wra mos dhe ober y'gan wellies, ha hwath bos igor.Yth esa own livans dhe'n nessa morlanow yn myttin Dy'Yow, mes ewnansow rag tro a lestas dell hevel damach pella.Tewedh Eleanor a dhros gwynsow a beswar ugens mildir a'n our ha tonnow eth poynt pymp aga braster, gans Gonis Tan Kernow a dhegemeras lies galow rag dyghtya livow, drehevyansow damejys ha gwydhennow kodhys.
Benyn, kellys wosa tan dhe vungalow, re beu konfirmys marow.Re beu hi henwys gans tus leel avel Susan Crapp, neb a veu yn hy degvledhen tri-ugens hag y ferwis dhe'n chi yn Barbican Hill, Logh.Y ferwis hy dew gi ynwedh y'n tan dhe Nos Bledhen Nowydh.Kentrevek Robin Pengelly a leveris dell glewas ev ha'y wreg tardh ughel pan dhallathas an tan hag ev "a assayas dhe sawya Sue".Ev a leveris: " ny yllis vy entra ynno. Yth esa flammow hegas yn feur ow tos mes a'n fenestri ha mes a'n darasow."Tangasoryon a leveris ynwedh bos an tanses gwyls.Y feu gwrys a-dro dhe dheg galwen ha dewgens dhe naw,naw,naw, tamm kyns eth yn gorthugherweyth . Yma acheson an tan ow pos dyghtys avel heb displegyans.Y feu an tan difeudhys wortiwedh ogas dhe bymp warn ugens wosa teyr eur, myttinweyth Kalan Genver.Y pysir nebonan gans kedhlow a dherivas Kreslu Dewnens ha Kernow.
Meres dre re beu kablys wosa dasleverel an pyth re beu deskrifys avel kampol "hilgasiek".Y feu gwrys krodhvol war fara Meres Essa Jean Dent gans konselores dre aral.Konselores Averil Pinckney a leveris an kampol, gwrys kyns kuntelles dhe hel an dre Essa, dhe vos "disfaverus, euthyk ha shyndyek".Mestres Dent a leveris bos an kampol gwrys yn "keskows privedh" ha Mestres Pinckney "a'n kemmeras mes a gettesten".An hwarvedhyans a veu hwithrys gans sodhek gorwolyas dhyworth Konsel Kernow neb a rewlyas an le hag an termyn聽 a'n keskows dhe vos "anwiw".Mestres Dent a veu breusys a dorrva an Kod a Fara rag Konsel Tre Essa hag yth erghis dhedhi dhihares dhe Vestres Pinckney hag attendya trenyans diversita.
Chi golyow yn Kernow, may skrifas Daphne du Maurier hy hynsa novel, re beu res studh rolys Gradh Dew.An awtores a skrifas The Loving Spirit, dyllys yn mil naw kans unnek warn ugens, dhe'n garth skath kyns war Avon Fowi yn Bosdinek, Kernow Soth Est.Wosa y dhyllans, du Maurier a leveris bos an novel awenys gans "sens rydhses" a dhri an chi.An chi ha'y gay a veu rolys gans Asran Gonisogeth, herwydh avisyans Pow Sows Istorek.An awtores yw martesen aswonnys gwella rag hy novel 'Rebecca'.Ferryside a veu prenys yn mil naw kans hwegh warn ugens gans teylu du Maurier, neb a'n treusfurvyas dhe ji nessa.Mab du Maurier, Christian Browning,聽 a leveris: "Ow mamm a wordhyas an chi, hag y kara hi Kernow,聽 hag esa an desedhans a'y novelys moyha a-vri."Sur ov y fia hi prout dres eghen y krontyas Pow Sows Istorek dhe Ferryside rolyans Gradh Dew."An drehevyans a veu gwrys a wrowan leel yn etek kansow a-varr, hag o hwelji gorhelydh, garth ha kay, hag yw duryer posek ertach morek Kernow, y leveris Pow Sows Istorek.Studh rolys Gradh Dew a dhiskwedh kevren an chi dhe du Maurier ha'y vri pennsernethek hag istorek.
Yth esowgh hwi ow koslowes orth 'An Nowodhow' war 大象传媒 Radyo Kernow. An dowlen an seythen ma a veu skrifys gans Julia Wass, ha genev vy, Duncan McIntosh. Bys dy'Sul nessa, nos da dhywgh hwi oll.