大象传媒

An Nowodhow: 14ves a vis Genver 2018
Gorthugher da, ha dynnargh dhe dhyllans an seythen ma 'An Nowodhow' war 大象传媒 Radyo Kernow.
Trigoryon Dydemin, gwig desedhys war gonna tir an Lysardh, a lever aga bos prederys y fydh effeyth dregynnus war aga hemeneth pan vydh degys an skol gynsa, dhe benn mis Genver.
Leveryas a-barth 'Keskowethyans Multi Academy Trust', hag a dhyght an skol, a dherivas bos res hy degea drefen an niver a dhyskyblon dhe godha.
Byttegyns, herwydh an drevesigyon, ny vynnsa teyluyow, ha dhedha fleghes yowynk, dos dhe driga ena mar pe degys an skol.
David Murray, tas Joel, unnek bloodh y oos, a leveris, 'Nyns eus marnas dew drymis gesys ha res yw dhodho remova dhe skol nowydh. Distemprys ha serrys yn feur on ni yn y gever'.
An trest a dherivas ev dhe wul an ervirans gans 'kolon boos' mes bos y amkan chif difres 'adhyskans ha sewena an yonkers'.聽
Yma aluseneth ow kul prov a servis nowydh yn Kernow rag tus, ha dhedha kudynnow kleves brysel, may hallons i gul devnydh anodho dhe bub eur yn le hwilas dyghtyans dhe'n klavji.聽
An aluseneth nowydh, Valued Lives hy hanow, re dhegemeras deg ha tri ugens a vilyow a beunsow dhyworth Gonis Yeghes Kenedhlek may hallons i provia an servis nowydh dres tri mis dhyworth kresen yn Resrudh.聽
Perthyoryon a yll kestava orth bodhogyon hag oberoryon yegheswith dhe bub eur an jydh dre bellgowser ha der an kesrosweyth.
Ha, mars yw gwell gansa y wul, y hallons i vysytya an gresen yn Resrudh rag kewsel gans nebonan orth ganow.
Enyshes dhyworth eseli erel hy klassow re beu studhyores dhe skol yn Pennsans wosa hi dhe dreghi ogas hag oll hy blew a-barth aluseneth.
Niamh Baldwin, peswardhek bloodh hy oos, a ros hy hudynnow dhe'n Little Princess Trust, aluseneth hag a wra perukennow rag fleghes usi ow kelli blew aga honan - herwydh usadow drefen aga bos klav po bos dyghtyes rag neb kleves sevur, kepar ha kanker.
Byttegyns, kemerys mes a'y klassow veu hi awos bos hy blew re gott.聽
Les Hall, ispenndhyskador Mounts Bay Academy a dhisplegyas y fia Niamh enyshes 'dres termyn berr' drefen hy semlant 'dhe dhistempra ha sowdheni nebes studhyoryon hag eseli a'n meni'. Ev a geworras na wrug an skol degemeres derivadow dhyworth Niamh a-dro dhe'n hwarvos a-barth an aluseneth kyns hi dhe dreghi hy blew ha nag esa kler dhe'n dhyskadoryon, y'n eur na, prag y'n gwrussa.
Niamh re omjunyas hy klassow unnweyth arta ha lemmyn yma hi 'ow studhya yn sewen'.
Mamm Niamh, Anneka Baldwin, a leveris hy bos gothus a'y myrgh mes ny wrussa hi degemeres an prays o gwiw dhedhi.
Trethow Kernow re beu kudhys gans skoll ow sewya tewedh Eleanor.
Professor Richard Thompson a Bennskol Aberplymm a dhisplegyas an tonnow krev dhe skubya kalsow a skoll dhyworth goles an mor hag y dewlel war dir.
Yn lies le, yma seulabrys bodhogyon owth assaya glanhe aga threth leel.
Martin Dorey, esel an bagas kaskyrgh #2minutebeachclean, a'n deskrifas avel 'tonn lanow a skoll'. Yma ev ow kenertha an werin dhe spena diw vynysen ow kuntel strol hag i ow vysytya an trethow.
Bodhek, James Dixon, neb a guntellas peswar kans, etek ha tri ugens a dharnow a strol dhyworth treth Porth an Men a leveris 'Euthek yw, yn hwir, mes ny wra hemma mos mes a wel marnas pubonan a wra aga rann vyghan a'n ober'.
Yth esowgh hwi ow koslowes orth 'An Nowodhow" war 大象传媒 Radyo Kernow.聽 An dowlen an seythen ma a veu skrifys ha presentys genev vy, Steve Penhaligon. Bys dy' Sul nessa, nos da dhywgh hwi oll.