Booth agus Rowntree
Nochd dithis a bha cudromach mu thoiseach na linne. Bha ùidh aig Charles Booth agus aig Seebohm Rowntree ann am bochdainn ann am Breatainn. Chuir iad le chèile taic ri rannsachadh a thaobh na bh' ann de bhochdainn agus na h-adhbharan air a shon.
Charles Booth
- Rinn e rannsachadh ann an Lunnainn, eadar 1886-1903.
- Dh'fhoillsich e an aithisg Life and Labour of the People in London.
- An dèidh agallamhan cuide ri daoine bochda, dotairean, tidsearan agus sagartan, cho-dhùin e gun robh 30% de mhuinntir Lunnainn ann am bochdainn.
- Thuirt e gun robh daoine ann am bochdainn ma bha iad a' cosnadh na bu lugha na 21s san t-seachdain.
- Dhearbh toradh an rannsachaidh aige gun robh bochdainn ag adhbhrachadh tinneas agus bàs agus nach robh coire aig na bha bochd ris an t-suidheachadh san robh iad.
Seebohm Rowntree
- Rinn e rannsachadh ann an Iorc eadar 1899-1901.
- Dh'fhoillsich e an aithisg Poverty, A Study of Town Life.
- Cho-dhùin e gun robh 30% de mhuinntir York ann am bochdainn agus gum feumadh iad 21s a chosnadh san t-seachdain airson cumail a-mach à bochdainn. Ma bha iad a' cosnadh na bu lugha na sin, bha iad fo 'loidhne na bochdainn'.
- Thuirt e nach robh cothrom aig daoine air a bhith bochd agus gun robh teaghlaichean mòra a' cur ris a' bhochdainn.
Bha toradh an rannsachaidh aig Booth agus aig Rowntree ag aontachadh air dà phrìomh phuing:
- Bha suas ri 30% de shlugh nam mòr-bhailtean beò air, no fo, Loidhne na Bochdainn.
- Cha b' urrainn do dhaoine iad fhèin a thoirt a-mach à bochdainn.
Chomharraich Booth agus Rowntree tinneas, cion obrach agus aois mar phrìomh adhbharan airson bochdainn. B' e feadhainn glè òg agus seann daoine a bu mhotha a bh' ann an cunnart bochdainn.