Blogio a blagio
Mae wythnos yn amser hir mewn gwleidyddiaeth ac mae pedair blynedd yn oes yn hanes y rhith fyd. Un o nodweddion mawr etholiad 2007 oedd ffrwydrad y blogiau. Fe ddaeth y rheiny a chyffro i'r ymgyrch cyn chwarae rhan reit bwysig yn y deuddeg wythnos ryfedd hynny pan oedd y pleidiau wrthi'n ceisio ffurfio llywodraeth.
Mae pethau'n wahanol iawn y tro hwn. Yn rhannol mae hynny'n adlewyrchu twf safleoedd fel Facebook a Twitter ac mae'r un ffenomen yn amlwg mewn amryw o wledydd. Cynhaliwyd cynhadledd yn Llundain wythnos ddiwethaf er enghraifft gyda'r teitl "Blogging: Yesterday's news?"
Ond os ydy'r blogiau braidd yn fflat y tro hwn mae hynny hefyd i raddau yn adlewyrchiad o ymgyrchoedd cenedlaethol gan y pleidiau sydd wedi bod yn ddigon solet ond ychydig yn ddi-sbarc. Rwyf wedi dod i'r casgliad bod hynny'n gwbl fwriadol.
Gan fod David Cornock wedi dewis dyfynnu Mario Cuomo ar ei flog yntau rwyf am ail-adrodd geiriau gwleidydd Americanaidd arall yn fan hyn. Tip O'Neill, llefarydd TÅ·'r Cynrychiolwyr yn y saithdegau a'r wythdegau wnaeth fathu'r dywediad "all politics is local". Mae hynny'n arbennig o wir am etholiadau Cynulliad.
Dydw i ddim am ail-adrodd hen bregeth ynghylch natur rhannol gyfrannol system bleidleisio'r cynulliad ond mae'r cysylltiad rhwng y canran o'r bleidlais y mae plaid yn ei ennill yn genedlaethol a'r nifer o seddau fydd ganddi yn y Cynulliad yn ddigon bregus.
Yn 2007 er enghraifft roedd cyfanswm pleidleisiau Plaid Cymru a'r Ceidwadwyr o fewn ychydig filoedd i'w gilydd. Enillodd y Cenedlaetholwyr bymtheg sedd a'r Torïaid ddeuddeg. Yn yr un modd mae'n hawdd dychmygu sefyllfa y tro hwn lle gallai'r Democratiaid Rhyddfrydol ennill 8-9% o'r bleidlais a chadw bron y cyfan o'u seddau neu golli bron y cyfan.
Mewn etholiad cynulliad mae ymgyrchu lleol a thargedu adnoddau yn gwbl allweddol. Am y rheswm hynny dydw i ddim yn llwyr ddiystyru ymdrechion gan ambell i blaid i blagio am ganlyniad annisgwyl mewn ambell i etholaeth - De Clwyd neu Geredigion, er enghraifft.
Ond os mai'r lleol sy'n allweddol pa bwys i'r ymgyrch genedlaethol?
Rwy'n tybio bod y strategwyr wedi dilyn cyngor Hippocrates - "Yn gyntaf, gochelwch rhag gwneud niwed". Pwyll piau hi.
Golygydd Materion Cymreig y ´óÏó´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Oes na really rwbath i flogio am?. Etholiad HYNOD o ddiflas, gobeithio fydd y nos iau/dydd gwener yn well!
Er gwybodaeth- gret gweld chi ar AM.PM heddiw, ac yn ambasador *fantastic* i'r iaith Gymraeg gan galw pencadlys y ´óÏó´«Ã½ yn "Landaff", tybio a fydd y chi yn mynd yn ol i galw Caernarfon yn Caernarvon ayyb!?!
Ydi'r ffaith fod pobl yn tueddu i gyfeirio at Etholiadau Cynulliad yn y lluosog, yn wahanol i'r Etholiad Cyffredinol unigol, yn adlewyrchiad o natur fwy lleol y cyntaf ysgwnni? H.y 40 o etholiadau bychain, yn hytrach nag un mawr?