ایک رات مشہور ٹاک شو میں قبائلی علاقوں میں دہشت گردی کی صورتحال پر بحث ہو رہی تھی۔ پینل میں ایک ریٹائرڈ اعلی فوجی اہلکار کو موضوع کا ماہر سمجھ کر بلایا گیا تھا۔ جب بحث میں گرمی آئی تو ان صاحب نے اینکر پرسن کی بات کاٹتے ہوئے کہا کہ 'جناب آپ وانا کو چھوڑ دیں جنوبی وزیرستان میں کیا ہو رہا ہے اس وقت'۔۔۔ گویا ماہر موضوع کو یہ پتہ نہیں تھا کہ وانا اور جنوبی وزیرستان دو الگ الگ علاقے نہیں بلکہ وانا جنوبی وزیرستان کا صدر مقام ہے۔

کسی اور چینل پر اسی نوع کے ایک مباحثے میں سوات میں پرتشدد واقعات میں اضافے پر ماہرانہ آراء دی جا رہی تھیں۔ سوال کیا گیا کہ سوات میں تشدد میں اضافے کی وجوہات کیا ہیں۔ تو ایک اور ریٹائرڈ اعلی اہلکار کا کہنا تھا 'دراصل بات یہ ہے کہ سوات کی سرحد باجوڑ ایجنسی سے جاکر ملتی ہے۔ فوج نے جب باجوڑ میں کارروائی شروع کر کے شدت پسندوں پر دباؤ بڑھایا تو وہ بھاگ کر سوات چلے گئے اور وہاں پر انہوں نے طالبان کے ساتھ مل کر کارروائیوں میں شدت پیدا کردی ہے'۔ ماہر صاحب کی یہ بات سن کر مجھے ان کی جغرافیائی معلومات مشکوک لگیں چونکہ وہ نامی گرامی تجزیہ نگار کے طور پر جانے جاتے ہیں سو میں نے تصدیق کی خاطر پاکستان کے نقشہ پر نظر دوڑائی۔ میرا شک صحیح نکلا کیونکہ نقشے میں دیکھا کہ باجوڑ ایجنسی کی سوات کے ساتھ تو سرے سے سرحد ہی نہیں ملتی ہے۔

پاکستان کے ایک اور نامی گرامی اینکرپرسن نے اپنے پروگرام میں قبائلی علاقوں سے متعلق اپنے ناظرین کی معلومات میں اضافے کی خاطر صوبہ سرحد کے سابق گورنر عارف بنگش کو مدعو کیا تھا۔ ایک سوال کے جواب میں جب بنگش صاحب نے کہا کہ قبائلی علاقوں میں سینکڑوں قبائلی مشران کو ہلاک کیا گیا ہے، تو اینکر پرسن نے اگلا سوال داغتے ہوئے کہا کہ 'اچھا یہ جو سینکڑوں پولٹیکل ایجنٹ مارے گئے ہیں۔۔، تو اس دوران عارف بنگش نے مداخلت کی اور کہا دیکھیں، پولٹیکل ایجنٹ اور قبائلی مشران میں فرق ہے۔ یوں انہوں نے مکمل وضاحت کی لیکن اس کے باوجود وہ صاحب آخری وقت تک کنفیوز رہے اور قبائلی مشران کو پولٹیکل ایجنٹ ہی سمجھتے رہے۔ شاید اینکر پرسن پولٹیکل ایجنٹ کو سیاسی نمائندگان کے معنوں میں لیتے رہے۔

جب امریکی ڈرون حملے میں طالبان کمانڈر بیت اللہ محسود کی ہلاکت کی خبر آئی اور کئی ہفتوں تک اس کی تصدیق نہیں ہو رہی تھی تو کسی زمانے میں نواز شریف کے تقریر نویس اور ملک کے ایک نامور کالم نگار سمجھے جانے والے صاحب نے ایک ٹیلی ویژن چینل پر اپنی 'سازشی تھیوری' پیش کرتے ہوئے دور کی کوڑی لائی اور کہا کہ بیت اللہ محسود مارا نہیں گیا ہے بلکہ انہیں امریکی اپنے ساتھ اٹھا کر لے گئے ہیں اور وہ انہیں کسی بھی وقت پاکستان کو عدم استحکام سے دو چار کرنے کے لیے واپس قبائلی علاقے لا سکتے ہیں۔ جس دن مجھے بیت اللہ محسود کی مردہ حالت میں بنائی گئی ویڈیو ہاتھ لگی تو مجھے ان صاحب کی بات یاد آئی اور اس وقت میں مسکراہٹ کے سوا اور کر بھی کیا سکتا تھا۔

چلیے واقعات پر مبنی خاکہ مکمل ہوگیا ہے۔ اب آپ لوگوں سے میرا سادہ اور آسان سا سوال یہ ہے کہ اگر آپ پاکستان میں بڑھتی ہوئی شدت پسندی سے متعلق ' کنفیوز' ہیں تو آپ کے خیال میں کیا اس میں پاکستانی میڈیا پر بھاری بھرکم لاحقوں اور سابقوں سے لیس تجزیہ نگاروں اور اینکر پرسنز کا بھی کوئی ہاتھ ہو سکتا ہے؟