|
Cymhwyster Sgiliau Allweddol
2000
Sgiliau Allweddol a Hyfforddiant Seiliedig-ar-Waith
Fel Hyfforddai Cenedlaethol neu Brentis Modern gelli di ennill cymwysterau mewn Sgiliau Allweddol yn ychwanegol at dy NVQs.
Mae unedau ym mhob un o’r chwe Sgil Allweddol ar gael ar bum lefel wahanol (lefel 1 yw’r hawsaf). Fel arfer bydd prentisiaid a hyfforddeion yn cymryd unedau ar lefelau 1, 2 neu 3.
Mae pa Sgiliau Allweddol rwyt ti’n eu cymryd ac ar ba lefel yn dibynnu ar y swydd rwyt ti’n cael dy hyfforddi ar ei chyfer.
Beth fydd y prawf ar gyfer y Cymhwyster Sgiliau Allweddol newydd?
Bydd y rhan fwyaf o’r marciau yn dod o ‘bortffolio’ (ffeil neu ffolder) o ‘dystiolaeth’ y byddi di yn ei chasglu.
Gall ‘tystiolaeth’ fod yn unrhyw beth rwyt ti wedi ei wneud sy’n profi fod gen ti’r sgiliau angenrheidiol. Ymysg enghreifftiau posib mae adroddiad ysgrifenedig (Cyfathrebu), graff (Defnyddio Rhif) neu allbrint cyfrifiadurol (TG).
Bydd rhaid hefyd i ti sefyll prawf ysgrifenedig ar gyfer pob uned Sgiliau Allweddol. Efallai y cei di dy esgusodi rhag y rhan hon os oes gen ti gymhwyster perthnasol yn barod.
Ni fydd gofyn o reidrwydd i ti gael gwersi Sgiliau Allweddol ar wahân oherwydd gall llawer o’r dystiolaeth ddod o waith rwyt ti’n ei wneud eisoes fel rhan o dy lefel A/AS, GNVQ, AVCE neu gwrs NVQ.
Sgiliau Allweddol a lefel A/AS/CGCCau/AVCEau
O fis Medi 2000 ymlaen gelli gymryd unedau yn y tri Sgil Allweddol cyntaf, sef:
- Cyfathrebu
- Defnyddio rhif
- Gwybodaeth a
Technoleg Cyfathrebu
ar lefelau 1, 2 neu 3, ochr yn ochr â dy gyrsiau lefel A/AS neu AVCE.
Gellir cyfuno’r unedau hyn i ffurfio’r Cymhwyster Sgiliau Allweddol newydd a allai dy helpu i gael gwaith neu le mewn prifysgol.
|
