´óÏó´«Ã½

Mi fydd gwaith ar ganolfan iechyd newydd yn Aberteifi yn dechrau yn fuan yn 2015.

Fis Rhagfyr daeth cyhoeddiad y bydd Ysbyty Aberteifi yn rhoi'r gorau i drin cleifion sydd ddim yn gleifion allanol o fis Mawrth ymlaen.

Ers Chwefror 28 mae gwelyau yn cael eu darparu gan gartrefi gofal yn y gymuned.

Mae llawer o wrthwynebiad wedi bod i'r penderfyniad yn lleol, ac fe gafodd deiseb gyda 11,042 o enwau ei chyflwyno i'r Cynulliad ym mis Ionawr.

'Penseiri wedi eu penodi'

Mae Bwrdd Iechyd Hywel Dda wedi dweud y bydd y ffordd newydd o ddarparu gwasanaethau cleifion mewnol yn "sicrhau gofal diogel a chynaliadwy i gleifion yn y dyfodol".

Dywedodd eu prif weithredwr Trefor Purt: "Bydd gwaith yn dechrau ar y cyfleuster iechyd a gofal cymdeithasol ym mis Ebrill y flwyddyn nesaf a bydd yn welliant mawr.

"Rydym eisiau ei gwneud yn ganolfan ar gyfer gwasanaethau tu allan i ysbyty.

"Bydd gan y ganolfan newydd glinigau cleifion allanol, canolfan ar gyfer meddygon teulu a nyrsys ardal, diagnosteg, ffisiotherapi a fferyllfa. Mae penseiri eisoes wedi cael eu penodi.

"Does dim cynlluniau i gau Ysbyty Aberteifi nes mae'r gwasanaethau newydd yn eu lle."