´óÏó´«Ã½

Mae prif hyfforddwr y Scarlets, Wayne Pivac wedi galw ar ei dîm i "greu hanes" a chyrraedd ffeinal Cwpan Pencampwyr Ewrop am y tro cyntaf yn eu hanes.

Mae'r Scarlets yn wynebu Leinster yn y rownd gynderfynol yn Stadiwm Aviva, Dulyn ddydd Sadwrn.

Dywedodd Pivac y bydd y Scarlets yn gorfod mynd i'r afael â'r tîm sy'n perfformio orau yn Ewrop os am ennill eu lle yn y rownd derfynol.

Dyma fydd y bedwaredd gwaith i'r Scarlets chwarae mewn rownd gynderfynol Ewropeaidd - gan gynnwys dau fel Clwb Rygbi Llanelli - ac mae Pivac yn credu y byddai cyrraedd y rownd derfynol yn un o gyflawniadau mwyaf yn hanes y clwb.

Mae perfformiad Leinster yn y gystadleuaeth wedi bod yn wych, gan sicrhau 27 pwynt allan o 30 pwynt posib yn eu chwe gêm grŵp cyn trechu Saracens yn rownd yr wyth olaf.

"Dyma fyddai moment fwyaf y clwb ar wahân i drechu'r Crysau Duon yn 1972," meddai'r gŵr o Seland Newydd.

Dywedodd Pivac mewn cynhadledd i'r wasg yn Llanelli ddydd Mawrth: "Er bod y Scarlets yn teithio i Ddulyn mewn hwyliau hyderus, rydym yn sylweddoli fod tasg enfawr o'n blaenau.

"Maen nhw [Leinster] wedi gwneud yn anhygoel yn y gystadleuaeth, ac i beidio colli unrhyw gêm gartref nac oddi cartref, yn erbyn timau o'r safon yma, mae'n dangos cryfder eu carfan.

"Byddai'n braf cael cyfle i fynd gam ymhellach yn y gystadleuaeth, ac rydym yn sicr yn gwybod fod hynny yn dasg enfawr.

"Mae Leinster yn ffefrynnau yn y gystadleuaeth, ac mae'n debyg y bydd yn rhaid i ni roi ein perfformiad gorau ymlaen."

Fe ddaeth y Scarlets - oedd yn bencampwyr y Pro12 y tymor diwethaf - yn ôl wedi dechrau gwael yn Ewrop y tymor hwn, gan orffen eu gemau grŵp drwy guro Caerfaddon a Toulon, cyn trechu La Rochelle yn rownd yr wyth olaf.

Ychwanegodd Pivac: "Gobeithio y gallwn ni berfformio yn dda a bydd hynny yn adlewyrchu'r gwaith caled sydd wedi mynd mewn i'n paratoadau ni."