´óÏó´«Ã½

Roedd yr Eisteddfod Genedlaethol wedi cael rhybuddion am beryglon llifogydd fisoedd cyn newid safle'r Brifwyl eleni, yn ôl tystiolaeth sydd wedi ei weld gan ´óÏó´«Ã½ Cymru.

Er gwaethaf cyhoeddi yn 2017 y byddai'r Brifwyl yn mynd i Lanrwst, roedd hi'n fis Rhagfyr 2018 cyn i'r trefnwyr gysylltu â phrif gorff amgylcheddol Cymru am y tro cyntaf.

Dywedodd Cyfoeth Naturiol Cymru (CNC) wrth yr Eisteddfod bod "peryglon ynglyn â llifogydd ar y safle yma ger Llanrwst".

Mewn e-bost pellach fis Ionawr eleni, ddaeth i law Newyddion 9, dywedodd CNC wrth yr Eisteddfod: "Pe byddai'r cynnig hwn yn cael ei gyflwyno i'r awdurdod cynllunio lleol, byddai Cyfoeth Naturiol Cymru yn lleisio pryderon sylweddol ynghylch perygl llifogydd y safle."

Mae'r Eisteddfod yn dweud y byddan nhw'n "dysgu gwersi".

Cyhoeddodd yr Eisteddfod fis Mawrth y byddai newidiadau i'r safle yn dilyn llifogydd yn ardal Llanrwst, pan gyrhaeddodd Afon Conwy ei lefel uchaf ar gofnod.

Hefyd ym mis Mawrth dywedodd Prif Weithredwr y Brifwyl bod yna "wersi i'w dysgu" wedi iddi ddod i'r amlwg nad oes modd yswirio'r Eisteddfod ar sail y cynlluniau gwreiddiol.

Mae disgwyl i'r Brifwyl gael ei chynnal rhwng 2-10 Awst ond nid yw'r union leoliad wedi cael ei gadarnhau eto.

Dywedodd llefarydd ar ran yr Eisteddfod wrth y ´óÏó´«Ã½: "Rydym wedi cydnabod y byddwn yn edrych i mewn i'r camau a gymerwyd er mwyn sicrhau bod gwersi yn cael eu dysgu i'r dyfodol.

"Mi fydd y gwaith yna'n cael ei gynnal maes o law, ond am y tro mae tîm yr Eisteddfod yn canolbwyntio ar sicrhau bod gan Eisteddfod Sir Conwy faes teilwng ac addas, gyda dymuniad i'w gadw mor agos â phosib i dref Llanrwst."