´óÏó´«Ã½

Mae hi wedi dod i'r amlwg bod dynes, a oedd yn credu bod ei mam yn cael ei thwyllo ar-lein, wedi rhoi £40,000 i'r twyllwr wedi iddi gael ei denu gan ei lais a'i straeon ffug.

Mae'r ddynes o dde ddwyrain Cymru yn wynebu dyledion anferth ar ôl cael ei dal mewn 'twyll rhamant'.

Dywed plismyn bod twyll o'r fath wedi cynyddu o bron i draean y llynedd.

Mae'r ddynes wedi rhannu ei stori â rhaglen X-Ray ´óÏó´«Ã½ Cymru gan ddweud ei bod wedi cael ei "blacmelio'n emosiynol" gan ddyn yr oedd hi'n wreiddiol yn amheus ohono.

Dywedodd: "Roeddwn yn amheus iawn o'r dyn yr oedd mam wedi dechrau perthynas ar-lein gydag e - yn enwedig wedi iddo ddweud fod rhywun wedi dwyn arian oddi arno ar Y Traeth Ifori."

Ond yna newidiodd ei meddwl wedi iddi siarad â'r dyn - oedd yn galw ei hun yn Jean Marc.

"Roedd ei lais yn hyfryd ac fe wnaeth ei straeon doddi fy nghalon," meddai.

"Fe anfonodd lun i fi mewn gwely ysbyty ac fe anfonais arian ato - 'nes i ddim dweud wrth mam. Fe wnes i e am fy mod eisiau iddi hi fod yn hapus."

Anfonodd €800 ato i ddechrau (oddeutu £712) ac yna 21 taliad arall - cyfanswm o £40,000 nes iddi sylweddoli ei bod wedi cael ei thwyllo.

Mae'r ddynes, sy'n fam i un, bellach yn wynebu dyledion mawr ac yn gwerthu gemwaith ei mam i dalu dyledion.

"Y peth anoddaf oedd dweud wrth y gŵr," medd y ddynes.

"Doedd e ddim yn gallu edrych arnai pan ddywedais wrtho a ni allai gredu fy mod wedi bod mor wirion.

"Rwy'n teimlo fy mod wedi cael fy mlacmelion'n emosiynol ac rwy'n gobeithio y bydd pobl yn meddwl ddwywaith cyn credu twyllwyr."

Wedi ymchwiliad gan yr heddlu daeth i'r amlwg bod Jean Marc yn dwyllwr a'i fod yn defnyddio'r cyfryngau cymdeithasol yn gyson i dwyllo pobl ymhellach.

Yn 2018 cafodd yr heddlu wybod am 4,555 achos o 'dwyll rhamant' - ac roedd cyfanswm y colledion a gafodd pobl 27% yn uwch na'r flwyddyn flaenorol.

Y gred yw bod nifer y dioddefwyr yn uwch gan bod rhai yn cadw'r twyll yn gyfrinachol.

Dywedodd Heddlu Gwent eu bod wedi gweld cynnydd sylweddol yn y math yma o dwyll.

Mae X-Ray i'w weld nos Lun am 19:30 ar ´óÏó´«Ã½ 1 neu ar ´óÏó´«Ã½ iPlayer.