´óÏó´«Ã½

Mae dyn gafodd ei eni yn China, ond sy'n byw ym Mhrydain ers dros ddegawd, wedi galw ar Boris Johnson am gymorth yn dilyn cynnydd mewn ymosodiadau geiriol ar y gymuned Chineaidd yn sgil achosion o'r coronafeirws.

Mae Dr Edward He, sy'n rhannu'i amser rhwng Abertawe a Bryste, yn dweud ei fod e a'i gyfeillion wedi profi achosion o bobl yn gweiddi arnyn nhw yn poeni eu bod wedi'u heintio â'r firws.

Mae Dr He - sydd wedi dysgu Cymraeg ar ôl cyfnod yn astudio a gweithio yn Abertawe - yn gobeithio bydd pobl Cymru yn cefnogi'r gymuned Chineaidd yn y cyfnod anodd hwn, ac yn dod i ddysgu mwy am y gymuned.

Dywedodd Llywodraeth Prydain eu bod yn gweithio gyda chymunedau i sicrhau bod gan bobl gefnogaeth ynglŷn â coronfeirws.

Achosion o gasineb ar gynnydd

Wrth siarad ar raglen y Post Cyntaf ar ´óÏó´«Ã½ Radio Cymru, dywedodd Dr He am ei brofiad pan oedd allan yn siopa gyda'i deulu ym Mryste'r penwythnos diwethaf.

"Roedd tri o bobl yn agos atom," meddai, "roedd y fam yn siarad gyda'i mab ifanc, ac fe ddywedodd 'Stay away from them'."

Dywedodd hefyd bod rhywun wedi gweiddi ar ffrind iddo sy'n astudio yn Abertawe, yn galw arni i fynd yn ôl i China, ac i beidio â lledu'r firws yno.

Yn gynharach yr wythnos hon, cafodd menyw sydd â stondin ym marchnad Aberystwyth gais i adael yr adeilad a mynd i gwarantin ar ôl iddi ddychwelyd o wyliau yn Taiwan, oherwydd ofnau am coronafeirws.

Yn ei lythyr at y prif weinidog, mae Dr Edward He yn dweud bod angen cymorth ar y gymuned Chineaidd, oherwydd bod achosion o gasineb ar gynnydd, gan bwysleisio ei fod e a'i ffrindiau yn falch iawn o fod yn byw ym Mhrydain, a'u bod yn teimlo fel rhan o'r teulu.

Dywedodd llefarydd ar ran Llywodraeth Prydain wrth y Post Cyntaf nad oedd unrhyw esgus dros dargedu unigolion o China, a'u bod yn gweithio gyda chymunedau ledled y wlad a'r heddlu i sicrhau bod gan bobl o bob cefndir y wybodaeth ddiweddara' a chefnogaeth ynglŷn â coronafeirws.