´óÏó´«Ã½

Mae Sŵ Môr Môn wedi lansio cronfa apêl argyfwng i geisio codi arian er mwyn sicrhau y bydd modd i'r cwmni barhau yn ystod y pandemig coronafeirws.

Mae'r atynfa, ger Brynsiencyn ar Ynys Môn, ar gau felly does dim incwm ar hyn o bryd.

Yn ôl y perchennog, Frankie Hobro, mae'r sefyllfa yn argyfyngus.

"Mae hi'n greisis arnom ni oherwydd does gennym ni ddim llif arian ar y funud ac mae'r argyfwng llif arian yn bodoli oherwydd nad oes 'na arian yn dod i mewn ar adeg pan fydden ni fel arfer yn gwneud 40% o'n helw blynyddol," meddai.

Dywedodd Llywodraeth Cymru ei fod wedi ysgrifennu at y pob sŵ yn crybwyll y cynlluniau sy'n bodoli y gallan nhw fod yn gymwys amdanynt i'w hariannu.

Mae angen rhyw £15,000 i £20,000 y mis ar Sŵ Môr Môn i dalu costau rhedeg sylfaenol.

Mae'r costau hynny'n cynnwys rhedeg pympiau dŵr a rheoli tymheredd tanciau sy'n gartref i greaduriaid prin fel ceffylau môr yn ogystal â chostau bwydo'r anifeiliaid.

Dywedodd aelod Cynulliad Ynys Môn, Rhun ap Iorwerth, bod angen pecyn cymorth arbennig i'r sŵ gan y llywodraeth.

"Mae 'na lawer o becynnau cymorth da wedi dod i fusnesau gan lywodraethau Prydain a Chymru, ond 'dan ni wedi darganfod dros yr wythnosau diwethaf 'ma bod 'na dyllau a bod 'na bobl sy'n disgyn drwy'r tyllau rheiny," meddai.

"Efo'r Sŵ Môr mae gennym ni fusnes sydd efo costau sylweddol yn gysylltiedig efo cadw dŵr yn oer a glan a chadw creaduriaid yn fyw.

"Felly be dwi'n gredu ydy bod angen pecyn cymorth sydd yn cymryd i ystyriaeth ofynion arbennig busnes o'r fath fel bod nhw'n gallu dod trwy'r adeg anodd yma."

Dywedodd llefarydd ar ran Llywodraeth Cymru: "Rydym wedi ysgrifennu at y sŵau yng Nghymru gyda manylion y cynlluniau sy'n bodoli eisoes y gallent fod yn gymwys i'w hariannu, yn ogystal â chyhoeddi holiadur i nodi pryderon allweddol ynglŷn â lles anifeiliaid ac a oes unrhyw fylchau yn y cyllid yn bodoli."