´óÏó´«Ã½

Mae corff sy'n cynrychioli myfyrwyr yn rhybuddio y bydd disgyblion sy'n gadael yr ysgol a graddedigion newydd yn ei chael yn anodd dod o hyd i swyddi o ganlyniad i argyfwng Covid-19.

Yn ôl y Sefydliad Cyflogwyr Myfyrwyr mae nifer y swyddi lefel mynediad wedi gostwng 23% ar draws Prydain.

Mae Alaw Davies, sydd yn ei blwyddyn olaf yn astudio hanes ac athroniaeth gwyddoniaeth yn University College London, wedi ymgeisio am nifer o swyddi sydd bellach wedi rhoi'r gorau i dderbyn mwy o geisiadau am y flwyddyn.

"Mae pethau'n edrych bach yn fwy tricky na'r arfer," meddai.

"O'n i yn gobeithio dechrau swydd cyn gynted ag i mi orffen fy nghwrs ym mis Mai, a dwi dal i edrych am swydd, ac wedi ymgeisio am lot ond heb lwc 'to.

"Yr ansicrwydd sydd wedi bod yn anodd yn y sefyllfa yma. Mae'r rhan fwyaf o bobl sy'n graddio yn ffeindio'r cyfnod yma bach yn ansicr, ond mae'r pandemig wedi cynyddu'r ansicrwydd yma."

Mae'r sefyllfa hefyd yn anodd i bobl fel Dan Clarke, 19 o Gaerdydd, ac sydd ar flwyddyn saib cyn mynychu Prifysgol Caergrawnt yn yr hydref.

"Fy nghynlluniau i am y flwyddyn oedd gwneud tymor sgïo yn Japan, ac ar ôl hynny trafeilio o gwmpas y wlad tan fis Mai," meddai.

"Ond yn anffodus roedd yn rhaid i fi ddod 'nôl o Japan ddeufis yn gynnar.

"Pan ddychwelais i, roedd lot o'r swyddi yn yr archfarchnadoedd wedi eu cymryd yn barod, so dwi wedi cael trafferth i ffeindio swydd yng Nghaerdydd. Mae'n gystadleuol iawn."

Mae'r sefyllfa hefyd wedi gorfodi pobl ifanc sydd eisoes yn cael eu cyflogi fel prentisiaid i addasu.

Yn eu plith mae Gwern Rowlands, 19 o Lanuwchllyn, sy'n astudio ar gyfer prentisiaeth adeiladwaith.

"Dwi'm yn gallu mynd i ngwaith dim mwy," meddai.

"Wedyn dwi'n teimlo bach yn gas... gorfod aros adre a jyst cario ymlaen y mwyaf dwi'n gallu gyda gwaith coleg.

"O'n i fod i orffen [y brentisiaeth], dwi'n siŵr mai wythnos yma oedd o. Oedd gennym ni exam ar-lein i'w wneud, ond dwi'm yn gwybod beth sy'n mynd ymlaen efo hwnna.

"Ar ôl gwneud yr holl waith, dwi jyst eisiau cael o 'di 'neud a chael y radd."

Gydag ofnau y bydd cyfleodd i sicrhau prentisiaethau neu swyddi yn prinhau dros y misoedd nesaf - mae'n gyfnod anodd i bobl ifanc fel Gwern, Dan ac Alaw.

Yn ôl Dylan Evans, cynghorydd o Gyrfa Cymru: "Mae yna lot o bobl ifanc a teuluoedd yn cysylltu hefo ni ar hyn o bryd yn gofidio am beth maen nhw'n mynd i wneud nesa'.

"Mae lot o bobl ifanc eisiau cario ymlaen efo'u haddysg.

"Mae yna bobl ifanc eraill wedyn sydd eisiau mynd mewn i'r byd gwaith, a gwneud prentisiaethau, ac mae hynny yn ansicr ar hyn o bryd, yn enwedig gan fod cyflogwyr ddim yn siŵr o beth sy'n digwydd chwaith.

"Felly mae o'n bwysig bod pobl ifanc yn edrych ar gynlluniau wrth gefn, ac yn defnyddio'r sgiliau sydd ganddyn nhw i edrych ar opsiynau gwahanol, falle i wneud bach o brofiad gwaith, gwaith gwirfoddol, i wneud yn siŵr bod eu sgiliau nhw yn datblygu."

Yn ôl Deborah Watson, cyfarwyddwr gwefan hysbysebu swyddi GraddedigionCymru, maen nhw wedi gweld gostyngiad o hyd at 90% yn nifer yr hysbysebion swyddi ar eu gwefan.

Er bod arwyddion o rywfaint o welliant, ychwanegodd Ms Watson: "Beth ry'n ni'n ei weld yw bod swyddi graddedigion sy'n cael eu cynnig gan gyflogwyr bach a canolig yn diflannu, gan fod nifer o'r cwmnïoedd hyn wedi gorfod rhoi eu staff presennol ar gyfnod o segurdod a dydyn nhw yn bendant ddim yn recriwtio.

"Mae hyn yn cael effaith arwyddocaol ar swyddi i raddedigion."