´óÏó´«Ã½

Mae Cymdeithas Bêl-droed De Cymru a'r heddlu yn ymchwilio i honiadau fod hyfforddwr wedi taro dyfarnwr yn ystod gêm merched ddydd Sul.

Cafodd yr ornest rhwng Merched Tredegar a Merched Lido Afan ei chanslo yn dilyn adroddiadau bod hyfforddwr Lido Afan wedi taro un o'r swyddogion.

Dywedodd CPD Merched Lido Afan wrth ´óÏó´«Ã½ Cymru eu bod yn cydweithio ag ymchwiliad Cymdeithas Bêl-droed De Cymru, ond nad oedden nhw am wneud sylw pellach ar hyn o bryd.

Mewn datganiad dywedodd Cymdeithas Bêl-droed De Cymru eu bod yn "ymwybodol o ymosodiad honedig ar ddyfarnwr".

Dywedodd Heddlu De Cymru eu bod wedi cael gwybod fore Llun am y digwyddiad ddydd Sul, a'u bod hwythau yn ymchwilio i'r digwyddiad ble gafodd un dyn "anfiadau i'w wyneb".

Mae'r ´óÏó´«Ã½ yn deall fod y digwyddiad yn ymwneud â dau ddyn.

Dywedodd Cymdeithas Bêl-droed De Cymru: "Yn unol â chanllawiau CBDC, mae'r troseddwr honedig wedi cael eu gwahardd o bob agwedd o bêl-droed tra'n bod ni'n aros am wrandawiad llawn. Allwn ni ddim gwneud sylw pellach ar hyn o bryd."

Wrth ymateb i'r honiadau ar y cyfryngau cymdeithasol, dywedodd prif weithredwr CPDC Noel Mooney eu bod "yn ymwybodol o'r digwyddiad".

"Mae nawr yn mynd i'r broses sydd yn rhaid i ni ei barchu, a chael ffydd y bydd cyfiawnder yn cael ei sicrhau," meddai.

"Dylai gwarchod a chefnogi ein swyddogion gemau wastad fod ar flaen ein meddwl... dim dyfarnwr, dim gêm."

Mewn datganiad ar y cyfryngau cymdeithasol dywedodd CPD Lido Afan, sy'n cynrychioli tîm y dynion, nad oedd ganddyn nhw "berthynas o gwbl" gyda CPD Merched Lido Afan, yn dilyn "digwyddiad ar y cae" dros y penwythnos.

Ychwanegodd y clwb: "Mae CPD Lido Afan yn condemnio unrhyw drais corfforol neu eiriol ac amarch tuag at swyddogion y gêm. Hoffwn ddymuno gwellhad buan i'r swyddog oedd yn rhan o'r digwyddiad heddiw."

Dywedodd cadeirydd CPD Tredegar, Andrew Evans wrth ´óÏó´«Ã½ Cymru Fyw fod y clwb yn "mynegi eu pryder ac ymddiheuriadau" i'r dyfarnwr.

"Allwn ni ddim caniatáu'r math yma o ymddygiad yn ein camp ar unrhyw lefel," meddai.

"Rydyn ni i gyd yn deall bod penderfyniadau anghywir yn gallu cael eu gwneud, a bod pobl yn teimlo rhwystredigaeth, ond ddylai hynny fyth olygu ymosodiad ar ddyfarnwr."

Dywedodd fod digwyddiadau o'r fath yn "annerbyniol", a'i fod yn poeni y gallai'r digwyddiad olygu bod llai o bobl yn awyddus i ddyfarnu.

"Fel clwb 'naethon ni anfon tair o ferched 15 oed ar gwrs dyfarnu ddoe, a nawr maen nhw'n gofyn i mi ai dyma'r peth iawn iddyn nhw. Does gen i ddim ateb i hynny," meddai.

"Mae angen dyfarnwyr ar y gêm, ond pwy yn eu iawn bwyll fyddai eisiau dyfarnu pan mae pethau fel hyn yn digwydd?"

Ychwanegodd fod y clwb yn "condemnio'r math yma o ymddygiad" a'i fod yn gobeithio y bydd y dyfarnwr yn dychwelyd yn fuan.

Dywedodd capten Merched Tredegar, Darcey Taylor, fod gweld digwyddiadau o'r fath o fewn pêl-droed merched yn "ddigalon iawn".

"Mae'n frawychus i'r chwaraewyr sy'n rhan o'r peth, yn enwedig ar adeg pan 'dyn ni'n ceisio magu hyder merched i chwarae pêl-droed," meddai.

"Gyda merched sy'n dod drwy'r oedrannau ifanc ac eisiau chwarae i'r timau hÅ·n, mae camu lan yn 15-16 oed yn brofiad nerfus i chwaraewyr beth bynnag heb fod pethau fel hyn yn digwydd."

Ychwanegodd nad oedd "unrhyw drafferth" wedi bod rhwng chwaraewyr y ddau dîm, a'u bod yn "hynod siomedig" fod y gêm wedi gorfod cael ei stopio.