´óÏó´«Ã½

Mae Clwb ±Êê±ô-»å°ù´Ç±ð»å Caerdydd wedi arwyddo capten Cymru, Aaron Ramsey.

Ar ôl cwblhau profion meddygol ddydd Iau, mae Ramsey, 32, wedi arwyddo cytundeb dwy flynedd gyda'r Adar Gleision.

Doedd dim rhaid i Gaerdydd dalu ffi am y chwaraewr canol cae, ar ôl i'w gytundeb gyda chlwb Nice yn Ffrainc ddod i ben.

"Mae'n teimlo'n anhygoel i fod yn ôl yma o'r diwedd," dywedodd. "Ro'n i wastad wedi meddwl y byswn i'n dod yn ôl un diwrnod a nawr yw'r amser perffaith i wneud hynny."

"Mae bod yn ôl gyda fy nheulu ac yng nghanol wynebau cyfarwydd yn wych... rwy' wedi colli hynny lot yn y flwyddyn ddwytha, felly roedd yn bwysig i mi fod yn ôl yn eu plith.

"Yn amlwg, rwy'n cefnogwr Dinas Caerdydd ac o'u gwylio ers i mi fod i ffwrdd, rydyn ni wedi cael rhai iselbwyntiau ond rhai uchelbwyntiau hefyd - bod yn yr Uwchgynghrair a chynrychioli Caerdydd ar y llwyfan mawr.

"Mae hynny'n darged gen i - ceisio helpu fy nghyd-chwaraewyr a'r clwb yma i fynd yn ôl i'r brig."

Dywedodd Ramsey iddo ddewis setlo nôl yng Nghaerdydd gyda'i deulu yn hytrach nag arwyddo cytundeb hael gyda un o glybiau Saudi Arabia.

Ychwanegodd capten Cymru iddo siarad â rheolwr y tîm cenedlaethol, Robert Page, cyn arwyddo cytundeb dwy flynedd gyda chlwb yr ail haen.

Mae hefyd yn gobeithio helpu talentau ifanc fel Rubin Colwill.

"Roeddwn bob amser yn gwybod yng nghefn fy meddwl y byddwn i'n dod yn ôl un diwrnod," meddai Ramsey wrth adran chwaraeon ´óÏó´«Ã½ Cymru.

"Rwy'n meddwl mai nawr yw'r amser iawn. Doeddwn i ddim eisiau dod yn ôl am flwyddyn neu rywbeth felly ar ddiwedd fy ngyrfa, rwyf eisiau dod yn ôl tra fy mod yn dal i deimlo y gallaf berfformio a helpu'r tîm.

"Nawr yw'r amser perffaith i wneud hynny."

Daeth Ramsey drwy dimau ieuenctid Caerdydd cyn arwyddo gydag Arsenal yn 2008.

Aeth yn ei flaen i chwarae dros 250 o weithiau i'r Gunners, cyn symud i Juventus yn 2019, ac yna Nice yn haf y llynedd.

Cafodd Ramsey, sydd wedi ennill 82 o gapiau dros Gymru, ei benodi'n gapten y tîm pêl-droed cenedlaethol am yr eildro nôl ym mis Mawrth.

Mewn cyfweliad â'r ´óÏó´«Ã½ ym mis Mehefin, dywedodd y byddai "wrth ei fodd" yn dychwelyd i Gaerdydd.

"Yng Nghaerdydd nes i dyfu fyny, a dwi'n ddiolchgar iawn eu bod nhw wedi rhoi'r cyfle i mi allu datblygu, ac i fynd ymlaen i gyflawni'r hyn yr ydw i wedi llwyddo ei wneud yn fy ngyrfa hyd yn hyn.

"Mi fyddai wastad yn ddiolchgar am hynny, a'r peth pwysicaf i mi nawr yw fy mod i'n gwneud y penderfyniad iawn i fi a fy nheulu," meddai.

Er bod Caerdydd wedi eu gwahardd rhag talu ffi am chwaraewyr newydd tan fis Ionawr, mae hawl ganddyn nhw i arwyddo chwaraewyr newydd ar fenthyg, neu rhai sydd heb gytundeb.

Ramsey ydi'r pumed chwaraewr i'r rheolwr newydd, Erol Bulut, ei arwyddo hyd yn hyn, gan ddilyn Yakou Meite, Dimitrios Goutas, Ike Ugbo a Karlan Grant.

Dywedodd Bulut: "Mae hwn, wrth gwrs, yn ddiwrnod gwych. Yma wnaeth Aaron ddechrau a nawr mae wedi dychwelyd i'n helpu ni i gyrraedd ein targedau.

"Mae Aaron wedi cael gyrfa wych - yn yr Uwch Gynghrair, yna yn Yr Eidal ac yn Ffrainc ac nawr 'nôl adref yng Nghaerdydd.

"Rwy'n gobeithio y bydd ei flynyddoedd olaf gyda ni yn rhagorol hefyd, ac y gallwn ni wireddu ein breuddwydion."