´óÏó´«Ã½

Mae prif weithredwr Cymdeithas Amaethyddol Frenhinol Cymru wedi dweud ei fod yn "disgwyl diweddariad" gan dîm milfeddygol Llywodraeth Cymru i weld a fydd y Ffair Aeaf yn cael ei chynnal eleni.

Cyhoeddodd trefnwyr Ffair Aeaf Lloegr fore Iau na fydd y ffair yn digwydd eleni oherwydd achosion o'r feirws Tafod Glas.

Dywedodd Aled Rhys Jones fod y "sefyllfa yng Nghymru i weld yn well na Lloegr ac mae Ffair Aeaf Cymru yn mynd ymlaen fel arfer" ddiwedd mis Tachwedd.

Mae achosion o'r feirws wedi ei ganfod mewn anifeiliaid yn y gogledd orllewin yn ddiweddar.

Dyma oedd y tro cyntaf i fath 3 o'r Tafod Glas gael ei ddarganfod yng Nghymru.

Mae'r feirws yn cael ei ledaenu gan rai mathau o wybed sy'n brathu, ac yn effeithio ar anifeiliaid fel gwartheg, geifr, defaid, ceirw, alpacas a lamas.

Nid yw’n effeithio ar bobl nag ar ddiogelwch bwyd.

'Monitro’r sefyllfa’n agos iawn'

Dywedodd Cymdeithas Amaethyddol Frenhinol Cymru mewn datganiad fod paratoadau ar gyfer y Ffair Aeaf yn parhau, ond eu bod yn cadw llygaid ar y datblygiadau diweddaraf.

"Roeddem yn drist o glywed bod Ffair Aeaf Lloegr wedi’i chanslo oherwydd sefyllfa barhaus y Tafod Glas ac ni allwn ond cydymdeimlo â threfnwyr y digwyddiad a’r holl arddangoswyr dan sylw.

"Ar hyn o bryd, nid oes parthau cyfyngol ar waith yng Nghymru ac mae Ffair Aeaf Frenhinol Cymru yn mynd ymlaen fel y cynlluniwyd.

"Rydym, wrth gwrs, yn monitro’r sefyllfa’n agos iawn ac yn cymryd cyngor gan ein milfeddygon proffesiynol.

"Wrth i ni ddechrau ar gamau olaf y paratoi at ein digwyddiad, byddwn yn ymdrechu i roi'r wybodaeth ddiweddaraf i bawb."