´óÏó´«Ã½

Mae Amgueddfa Lechi Cymru yn Llanberis wedi derbyn grant o dros £400,000 i'w helpu i ddatblygu.

Daw'r arian - £412,565 - gan Gronfa Treftadaeth y Loteri Genedlaethol, gyda'r nod o greu dyfodol "mwy disglair i orffennol diwydiannol y DU".

Y gobaith yw y bydd yr arian datblygu yn "trawsnewid yr amgueddfa yn atyniad o safon fyd-eang i ymwelwyr".

Fe fydd yr arian yn galluogi'r amgueddfa i barhau â'u cynlluniau i gyflwyno cais am grant llawn o dros £9m gan y gronfa yn y dyfodol.

Cafodd yr amgueddfa ei hagor ym 1972 ac fe ddaeth yn Safle Treftadaeth y Byd UNESCO yn 2021.

Wrth dderbyn yr arian datblygu, dywedodd Jane Richardson, prif weithredwr Amgueddfa Cymru bod yr amgueddfa "wrth ein boddau" i dderbyn yr arian datblygu.

"Yn ogystal â thrawsnewid ein hamgueddfa, bydd hyn hefyd yn newid y ffordd y gallwn adrodd hanes tirwedd llechi treftadaeth y byd gogledd-orllewin Cymru," meddai.

"Mae’r ariannu hwn yn nodi carreg filltir yn hanes yr amgueddfa a bydd yn ein galluogi i gysylltu â chymunedau ar draws Cymru a’r byd."

Mae Cronfa Treftadaeth y Loteri Genedlaethol yn buddsoddi dros £14.8m mewn wyth prosiect gwahanol ar draws y DU.