´óÏó´«Ã½

TAE HITLER

Wi’ apologies to the immortal Rabbie Burns!

Ye wee moustachioed paper — hinger
For years noo ye’ve been gaun yer dinger
But very soon yer knavish tricks
Will tak’ ye straucht doon tae Auld Nick’s.

Ye sent the Luftwaffe ower here
Thinkin’ tae mak’ us shake wi’ fear
But while the world looked on in wunner
Oor Spitfires dooned them by the hunner.

For years we’ve heard ye rave an’ rant
We’re seeck o’ a’ that humbug cant
Ye thought tae scare us wi’ the blitz
But noo ye’re frichtened oot yer wits.

Yer crony, wee Italian Duce
Wha’s navy hasna been much use
He tae will shairly get his due —
Auld Clootie’s imps will mak’ him gru’.

Himmler, Goering and Goebbels too,
Haw-Haw an’ a’ that nazty crew —
In Hell some day ye’ll a’ foregaither —
Auld Nick will greet ye like a faither.

A warnin’ word — ‘Tis only fair
Don’t try these Nazi tricks doon there
Auld Nick’s a jealous kin’ o’ craiter
Doon there he is the sole dictator.

An’ if ye try tae air yer views
He’ll haund ye tae a squad o’ Jews
If they get ye for hauf a tick
They’ll no’ leave much for puir Auld Nick!

© L/Cpl. Alexander Barr. 193 Fld. Amb. R.A.S.C. written 1943

© Copyright of content contributed to this Archive rests with the author. Find out how you can use this.