´óÏó´«Ã½

Tha luaidh ga dhèanamh air sean mhanaidsear Rangers, Everton agus Alba, Walter Mac a' Ghobhainn a dh'eug aig aois 73.

Bha Mgr Mac a' Ghobhainn air fhaicinn mar ghaisgeach aig Ibrox - rud air an robh e airidh air agus e a' glèidheadh 21 cupa nuair a bha e na mhanaidsear air an sgioba dà thuras.

'S e bha os cionn na sgioba nuair a ghlèidh iad na 7 tiotalan mu dheireadh ann an sreath de 9 tiotalan anns na 1990an.

Às dèidh sin, chaidh e a dh'obair aig Everton airson 4 bliadhna agus chur e seachad 2 bhliadhna mar mhanaidsear air sgioba Alba, mus do thìll e a dh'Ibrox ann an 2007.

Fhad's a bha e os cionn Alba, ghluais an sgioba 70 àitean suas na ranganan aig FIFA.

Fhuair e trì tiotalan eile an uairsin, agus fhuair an sgioba gu cuairt dheireanach Cupa Uefa ann an 2008.

Thuirt Cathraiche Rangers, Dùghlas Park gun robh e cha mhòr do-dhèanta mìneachadh cho cudromach 'sa bha Walter Mac a' Ghobhain dhan a h-uile duine aig Rangers.

"Bha e na shàmhla air mar bu chòir Ranger a bhith. Airson luchd-taic Rangers bha e na charaid do mhòran, na cheannard, na thosgaire agus na ghaisgeach mòr.

Bha spèis ann dhà bho luchd-leantainn de ga taobh.

Bha e na dheagh charaid do Thommy Burns, seann chluicheadair is manaidsear Celtic, agus e am-measg na fir a bha a' giùlain na ciste aig tòrradh Thommy.

Bhiodh e a' tadhal air na h-Eileanan an Iar agus a' cur seachad ùine a' coinneachadh le luchd-taic ann an Club Rangers Leòdhais agus na Hearadh ann an Steòrnabhagh.

Thuirt Club Rangers Leòdhais agus na Hearadh gur e briste cridhe a bh'anns an naidheachd gun do bhàsaich Walter Mac a' Ghobhainn.

"Anns a' chiad àite tha sinn ag aithneachadh an call aig teaghlach Mhgr Mhic a' Ghobhainn agus tha sinn a' caoidh fear de na daoine is ainmeal a tha air a bhith an luib Cluba Ball-coise Rangers".

Dhearbh Rangers anns a' Mhàirt gun robh Mgr Mac a' Ghobhainn anns an ospadal às dèidh obair-lannsa.

Bhàsaich e Dimàirt aig aois 73.