´óÏó´«Ã½

Anns an t-seirbheis cluinnidh sibh na sailm agus na leughaidhean a leanas:
Salm 34: 1-2 air fonn Walsall agus ‘s e Eòin Dòmhnallach a tha os cionn na seinn le taic bho choitheanal Eaglais na h-Alba ann am Port Rìgh.
Salm 34: 15-17 air fonn Torwood agus ‘s e Calum MacLeòid a tha os cionn na seinn le taic bho choitheanal Eaglais Shaor Chàrlabhaigh.
Salm 34: 18-19 air fonn Dundee agus ‘s e an t-Urramach Raghnall Moireasdan a tha os cionn na seinn le taic bho Choitheanal Eaglais Shaor Crow Road ann an Glaschu.

Leughaidhean: 1 Samuel 21: 10-15 & 22: 1-2 & Salm 34: 1-22

Ceann-teagaisg: Salm 34: 17

Buinidh Donaidh MacSuain do bhaile Sgarastadh anns Na Hearadh agus chaidh e don sgoil san Òb agus air an Tairbeart. Chuir e seachad 2 bhliadhna an dèidh sin ann an Àrd-sgoil Inbhir Nis mus do thòisich e ag obair ann am bùth Littlewoods sa bhaile.

B' ann an 1974 a thòisich e ag obair làn ùine aig Littlewoods agus chuir e seachad 8 bliadhna ann am bailtean mòra air feadh na rìoghachd, nam measg Lunnainn agus Oxford. Ghluais e a Ghlaschu an dèidh sin agus thòisich e anns an oilthigh, a' ceumnachadh le BD ann an 1990.

Chaidh a phòsadh ri coitheanal Eaglais na h-Alba ann an Ceann Loch Biorbhaidh ann an 1991 far an robh e na mhinistear airson 6 bliadhna. Às dèidh sin ghluais e gu Baile Eoghain agus tha e air a bhith an sin bhon uair sin. Tha ùidh mhòr aig Donaidh ann an ceòl, gu h-àraidh ceòl soisgeulach, Gàidhealach agus clasaigeach. Tha e air mòran CDan agus DVDan a thoirt a-mach. Cluichidh e fhèin iomadh seòrsa inneal-ciùil, nam measg an clarinet, inneal a tha e a' faighinn air leth freagarrach airson laoidhean agus ceòl Gàidhealach. Tha a' Ghàidhlig air a bhith na thlachd mhòr dha a-riamh agus tha e a' dèanamh iomadh oidhirp an cànan agus an ceòl a bhrosnachadh.