大象传媒

An NowodhowDy'Lun 21ves mis Genver 2018
Gorthugher da, ha dynnargh dhe dhyllans a'n seythen ma 'An Nowodhow' war 大象传媒 Radyo Kernow.
Towlen seyth kans, deg ha dewgens mil a beunsow rag dyghtya defolyans plastek re beu lonchys gans Maynorieth Gerghynnedh.An ragdres a sew arwostel an governans dy'Yow, unnegves mis Genver, dhe dhilea kudynnow atal goheladow y'n Ruvaneth Unys erbynn diw vil, dew ha dewgens.Y hwra an arghans pe para nowydh rag kavos digolmow dhe gudynnow defolyans plastek, kyns oll plastogow usyans-unnik, y'n Soth West."Mordon lanow" a blastek a frappyas trethow Kernewek wosa Tewedh Eleanor.Emma Howard Boyd, kaderyores Maynorieth Gerghynnedh, a wrug an derivas dhyworth Porthbud, Kernow, ha hi owth omvetya bagasow kerghynedhel hag alusenethow.Hi a leveris y hwra an para plastogow ha sostenadewder nowydh oberi gans negysyow rag lehe askorrans plastek ha kenertha moy gwethres kemeneth.Yma poblans a le es deg mil pobel dhe Borthbud mes re lonchyas dew gaskyrgh kerghynedhel ughel aga profil.An dhiw dowlen, #2minute beach clean ha Refill, a dhallathas y'n dre.Avril Sainsbury, dhyworth an ragdres Bude Cleaner Seas, onan a'n gowethysi owth oberi gans Maynorieth Gerghynnedh, a leveris hi dhe vos "pur lowen" dell via dewisys Porthbud rag lonchya an dowlen.Task Force Porth an Men re gemmeras yn-mes yntra hwetek hag etek tonnas a atal dhyworth trethow a-dro dhe Borthbud a-dhia diw vil hag unnek.Ado Shorland, neb a fondyas an bagas, a leveris: " Re beu Porthbud pup-prys tyller arbennik gans omglewans a gemeneth. Ni a gar oll an le may trigyn ni ha ni a omglew oll dever dhe wul neppyth, ha nyns yw kales dhe gavos hanterkans bodhek rag glanheans treth, mara'n galwiv unnweyth peswar warn ugens ourkyns."Yn seythen eus passyes, Theresa May a aswonnis yn tweet an ober a Bude Cleaner Seas.Emma Howard Boyd a leveris hi "a vynn yn tevri golowi kulwolow orth kemeneth ha re sesyas an attendyans a'gan pennvenystres".
Sodhek Lu Lestri Riel, neb a sawyas bewnans a gansow a soudoryon Vretenek hag Arghantinek dres Bresel Falklands re verwis, unnek bloodh ha tri ugens y oos.Owth oberi dres kesstudhyow euthyk y'n mes, Leuvvedhek Kapten Rick Jolly, dhyworth Penntorr, a sawyas bewnans pub souder neb a dhyghtyas.Hensouder Falklands Simon Weston a'n deskrifas avel "den digrysadow"Ev a leveris: "Heb y sleyneth ordenansek, nevra ny obersa an leuvvedhogyon hag medhogyon. Yn unnik y hallav vy godhvos gras dhodho a sawyans a'm bewnans ha re erel.Trajedi ywa rag pub huni a'n aswonni, ha trajedi yn arbennek rag y deylu."Wosa an vresel, Kapten Jolly a wrug skrifa lyvrow ha ri arethow rag may kevrenna y brevyansow dhyworth an gas.Aswonnys avel "Doc", ev o sodhek medhegel chif a Vrigad Commando Tri, selys yn Aberplym, hag a lewyas klavji mes dhe Baya Ajax, may feu dyghtys a-dro dhe vil souder.Yn despit dhe kesstudhyow drog, tri unnik a'n pymp kans peswar ugens a soudoryon ha Marines Riel, goliys yn batel a verwis a'ga goliow, ha den vyth a'n re yn-dann y with.An klavji a veu aswonnys avel an "jynn bewnans rudh ha gwyrdh", ha hemm a dheuth ha bos titel onan y lyvrow.Ev o appoyntys avel OBE gans an Vyghternes, hag o grontyas聽 an Orden de Mayo (po 'Urdh Me') gans Arghantina rag y servis dres an vresel.Kaslewydh Leuvvedhek Anthony Lambert a'n metyas lieskweyth, an kynsa tro tamm wosa dehweles dhyworth Enesow Falkland yn mil naw kans dew ha peswar ugens.Ev a leveris "Avel medhogyon, nyns on ni gorwer, agan soodh a wren ni.聽 Mes y hwrug ev y soodh fest yn ta, hag o awen rag ow henedh".
Yth esowgh hwi ow koslowes orth 'An Nowodhow' war 大象传媒 Radyo Kernow. An dowlen an seythen ma a veu skrifys gans Duncan McIntosh ha genev vy Julia Wass. Bys dy'Sul nessa, nos da dhywgh hwi oll.