سانتا لوزیا اور پکوڑے
ایمیزن کے ارد گرد محفوظ قرار دیئے گئے ایک علاقے یا ریزرو میں سانتا لوزیا کی بستی تھی۔ مختلف محفوظ علاقوں میں ویسے تو آبادی بہت ہی تھوڑی سی ہے اور جو ہوتی ہے وہ بھی ایک ایک دو دو خاندانوں کی شکل میں دور دور رہتے ہیں۔ لیکن سانتا لوزیا اس لحاظ سے مختلف ہے کہ اس میں کافی سارے خاندان رہتے ہیں اور چھوٹی موٹی کھیتی باڑی کے ساتھ ساتھ یہاں برازیل کا مخصوص آٹا منجیورکا بنانا آمدنی کا بڑا ذریعہ ہے۔
یہ تو ساری باتیں ہیں ہی لیکن سانتا لوزیا میں جب ہم پہنچے تو آسمان صاف اور تیز دھوپ تھی لیکن لگ بھگ ایک گھنٹے
بعد اچانک موسم اس قدر تبدیل ہوا کہ چند منٹوں میں ہی نہایت تیز طوفانی ہوائیں چلنے لگیں اور پھر جو برکھا لگی تو اللہ دے اور بندہ لے۔ موسم نے ہماری روانگی بھی ٹال دی کہ اب ایمیزن کی تندی خطرناک تھی۔
ہمارے منتظم برازیلی سروس کے ایڈیسن پورٹو سمیت سب ہی فکرمند تھے کہ تاخیر کتنی ہوگی اور آگے کیا ہوگا۔ ایک طرف تو یہ فکر تھی اور دوسری جانب ہندی سروس کے راجیش جوشی کو پکوڑے یاد آئے کہ برکھا ہو تو گرما گرم پکوڑوں کا مزہ آجائے۔ اور تو اور راجیش جوشی نے بات آگے بڑھا کر پکوڑوں کی اقسام تک بھی پہنچادی کہ آلو کے ہوں یا پالک والے ہوں یا کہ پیاز، زیرہ اور دھنیے کے ہوں۔ راجیش جوشی کی اس خواہش کا ناممکن ہونا اپنی جگہ لیکن سچی بات تو یہ ہے دل تو ہمارا بھی دل ہی ہے۔ اگر پکوڑوں کے لیے مچلا تو کیا بری بات تھی۔ چلیے پکوڑے نہ سہی، پکوڑوں کا ذکر ہی سہی۔ ویسے آپ ہی بتائیں اگر بیچ ایمیزن پکوڑے مل جاتے تو کیا مزہ نہ آجاتا۔
تبصرےتبصرہ کریں
پاکستان اور بھارت ميں بارش اور پکوڑے لازم و ملزوم ہيں ايسی چيزيں کھا کھا کر آپ لوگوں کی توند اتنی باہر آئی ہوتی ہے جيسے سب مرد بھی حمل سے ہوں۔ ادھر تو تقريبا روز ہی بارش ہوتی ہے تو کيا روز ہی پکوڑے کھائيں؟
کاشف قمر صاحب!اس سے ظاہر ہوتا کہ يہ انسانی فطرت ہے کہ وہ دنيا جہاں ميں کہيں بھی ہو اسے اپنے مادر وطن کی ياد کچھ اس طرح سے ستاتی ہے کہ اسے اپنا رہن سہن،ثقافت اور کھاجے ياد آتے ہيں۔ نيک تمناءوں کے کيساتھ اپنا دورہ انجوائے کيجئيے نيز تيز بارشوں ميں آپکی سلامتی بھی چاہتے ہيں
کاشف صاحب پکوڑے ہوں يا کوئی اور کھانے پينے والی چيز ہو، اس کو کھانے يا پينے سے پہلے بزرگوں کي يہ بات ضرور ياد رکھیں کہ ’پانی پيو پُن کے تے مُرشد پھڑو چُن کے‘!
آداب! کاشف صاحب لگتا ہے لندن ميں رہتے ہوئے زيادہ مرغن غذائیں کھانے سے آپ کی سوچ کا آئينہ دھندلا پڑ چکا ہے، جبھی تو ہر بات گھوم پھر کر کھانے پينے پر ہی آکر رکتی ہے۔ ساری دنيا میں خوراک کا بحران انتہائی خطرناک صورت حال اختيار کرتا جا رہا ہے، لوگ فی کس کے لیے ناکافی روٹی سانجھی کر کے سفيد پوشی کا بھرم رکھنے پر مجبور ہیں اور آپ کو پکوڑے تو کبھی چائے کی فکر نخيف کیے جا رہی ہے۔ ذرا کروڑوں مفلوک الحال انسانوں کے مخدوش ہوتے حالات کا سوچ کر فی الحال خدا کی دستياب نعمتوں پر ہی قناعت کيجیے اور اپنے سفر میں قاری کی دلچسپی کا بطور خاص خيال کرتے ہوئے آگے بڑھيے۔ مخلص
پکوڑوں کی بارش میں طلب اپنی جگہ ليکن اسماء کا تبصرہ کتنا بہترين ہے۔ آج کل تو ہر دوسری عورت سلمنگ سينٹرز، جم کا رخ کر رہی ہے کيونکہ آدمی خود کتنا ہی موٹا کيوں نہ ہو بيوی ياگرل فرينڈ اسے چاہيے زيرو سائز کی۔
مس اسما اور مس ثنا خان دونوں کے تبصرے نہا يت خوب ہيں ليکن سوال يہ پيدا ہوتا ہے کہ دھان پان سی دکھنے والی تتلی جيسی لڑکياں بھاری بھرکم خواتين ميں کيوں بدل جاتی ہيں ـ