|
Sut
mae gwneud cais?
Wyt ti wedi penderfynu
pa bwnc/pynciau rwyt ti am eu hastudio
a pha gyrsiau prifysgol mae gen ti
ddiddordeb ynddyn nhw? Yna
mae angen i ti wybod sut mae gwneud cais am le mewn prifysgol.
Ffeil Ffeithiau System Ymgeisio UCAS
Drwy gorff o’r enw UCAS – Gwasanaeth Derbyn y Prifysgolion
a’r Colegau – y gwneir pob cais bron am gyrsiau AU.
Gelli wneud
cais am le ar hyd at chwe chwrs. Nid yw hyn yn golygu fod rhaid
i ti gael un cwrs i bob sefydliad. Mae’n hollol bosibl i ti ddewis
pedwar cwrs neu hyd yn oed y chwech mewn un sefydliad. Rhaid i dy
ffurflen gais UCAS fod wedi cyrraedd erbyn 15 Rhagfyr er mwyn i
ti ddechrau dy gwrs yr Hydref canlynol. Rhaid i dy geisiadau fod
yn nhrefn yr wyddor. Mae hyn yn golygu fod prifysgolion yn ei chael
hi’n amhosibl i ddweud pa sefydliad oedd dy ddewis cyntaf.
Ar hyn o bryd mae ceisiadau gaiff eu derbyn ar ôl Ionawr 15 yn cael
eu nodi’n ‘gais hwyr’.
Mae UCAS yn anfon copiau o dy ffurflen i bob prifysgol rwyt wedi
ei dewis yr un pryd. Mae tiwtoriaid derbyn y prifysgolion yn dweud
wrth UCAS a ydyn nhw’n mynd i ‘gynnig’ lle i ti ai peidio. Gall
y rhai sy’n anfon cais i mewn yn hwyr ddarganfod eu bod yn cael
mwy o wrthodiadau, yn enwedig gyda chyrsiau poblogaidd fel y gyfraith,
Saesneg, astudiaethau cyfryngol a rhai gwyddorau cymdeithasol. Mae
UCAS wedyn yn pasio eu penderfyniadau i ti.
Ymgeiswyr Rhydychen a Chaergrawnt
Mae angen i ti lenwi ffurflen UCAS os yn ceisio am le yn Rhydychen
neu Gaergrawnt yn ogystal â ffurflen gais colegau unigol. Y dyddiad
cau ar gyfer Rhydycjhen a Chaergrawnt yw Hydref 15 i ddechrau dy
gwrs yr hydref canlynol.
Yn astudio meddygaeth neu deintyddiaeth?
Y cyngor i fyfyrwyr ar y funud yw na ddylen nhw anfon ceisiadau
i fwy na phedwar lle. Fe ddylet fod yn gallu ymgeisio am ddau gwrs
gwahanol heb unrhyw effaith er gwaeth ar dy geisiadau meddygol neu
deintyddol. Hydref 15eg yw’r dyddiad cau ar gyfer y cyrsiau yma
hefyd.
Unwaith mae’r penderfyniadau i gyd wedi eu derbyn gan UCAS fe fyddan
nhw’n anfon atat yn gofyn i ti ddewis pa gynnig i’w dderbyn erbyn
dyddiad penodol. Bydd y dyddiad yma’n dibynnu ar pryd y derbyniwyd
y ceisiadau i gyd. Ar hyn o bryd mae UCAS yn cynghori os nad wyt
wedi clywed oddiwrth brifysgol arbennig erbyn Mai yna dylet ystyried
eu bod wedi dy wrthod felly dylet wneud dy ddewis o’r cynigion sydd
ar ol.
Cei dderbyn hyd at ddau gynnig - un cynnig ‘pendant’ (dy ddewis
cyntaf) ac un cynnig ‘wrth gefn’ (dy ail ddewis). Mae rhai pobl
yn cynghori y dylai dy ddewis cyntaf fod yn gofyn am raddau cymharol
uchel tra bod dy gynnig ‘wrth gefn’ yn gofyn am raddau is er mwyn
rhoi’r cyfle gore i ti gael lle.
Ond cofia fod y cynigion yma wedyn yn cael eu hystyried yn rhwymo’n
gyfreithiol. Os cei di’r graddau, does dim rhaid i dy gynnig ‘pendant’
dy ryddhau o dy benderfyniad. Mae hwn yn bwynt pwysig, gan fod prifysgolion
yn dal i dderbyn myfyrwyr â graddau is. Er enghraifft mae dy ddewis
‘pendant’ yn gofyn am dair gradd-B a dy gynnig ‘wrth gefn’ yn gofyn
am dwy C a D. Rwyt yn cael un radd B a dwy radd C. Mae dy goleg
‘pendant’ yn dy wrthod ac rwyt yn penderfynnu ceisio am le mewn
prifysgol sy’n gofyn am y graddau sydd gennyt. Chei di ddim gwneud
hyn gan dy fod yn dal cynnig gan dy goleg ‘wrth gefn’. Mae’r ffaith
dy fod wedi cael graddau uwch na’r rhai roedden nhw’n gofyn amdanyn
nhw’n amherthnasol. Yr unig ffordd allan o’r benbleth hon fyddai
tynnu allan o gynllun UCAS, cymryd blwyddyn allan a cheidio eto
am le mewn prifysgol y flwyddyn ganlynol.
Os na chei di’r graddau sydd eu hangen i fodloni un ai dy gynnig
pendant neu dy gynnig wrth gefn a bod y ddau le’n dy wrthod, mae’n
dal yn bosib y cei di le mewn prifysgol drwy’r drefn ‘Clirio’. Os
yw hyn yn wir i ti fe gei di gynnig eang o opsiynau os wyt yn fodlon
bod yn hyblyg ynglyn ag i ba goleg yr ei di, ac mewn rhai achosion,
pa bynciau fyddi di’n eu hastudio.
Sut mae llenwi dy ffurflen UCAS
Os wyt ti’n fyfyriwr amser llawn bydd dy ysgol neu
goleg yn rhoi ffurflen UCAS i ti. Os wyt ti wedi gadael yr ysgol, gelli gael un o dy Ganolfan Gyrfaoedd
leol.
Gwna’n siwr fod gen ti gopi o Lawlyfr UCAS a’r llyfryn
UCAS ‘Cyfarwyddiadau ar Lenwi’r Ffurflen Gais’. Fe ddylet ti dderbyn y rhain gyda dy ffurflen gais.
Darllena’r cyfarwyddiadau’n ofalus cyn dechrau a
dilyna’r hyn y maen’ nhw’n ei ddweud i’r llythyren.
Gwna lungopi o’r ffurflen wag er mwyn ymarfer ar
y copi cyn ceisio llenwi’r ffurflen go-iawn.
Ysgrifenna’n glir gan ddefnyddio beiro du, neu llenwa
dy ffurflen â phrosesydd geiriau (defnyddia ffont pwynt 12) mewn inc du. Neu gelli ddefnyddio system
ymgeisio electronig UCAS ac e-bostio’r ffurflen neu ei hanfon i mewn ar ddisg.
Paid â gwneud camgymeriadau sillafu na chroesi
pethau allan. Gofynna i rywun arall fwrw golwg dros dy sillafu. Os gwnei di lanast, dechreua eto.
Rho sylw arbennig i adran 10, y datganiad personol.
Hon, a’r tystlythyr, yw rhannau pwysicaf y ffurflen.
Rho’r ffurflen i dy ganolwr mewn da bryd er mwyn
iddo ef/iddi hi ysgrifennu’r tystlythyr a’i phasio ymlaen i UCAS erbyn y dyddiad cau.
Cadw gopi o’r ffurflen ar ôl i ti ei llenwi.
Yn gwneud cais am gyrsiau Celf a Dylunio?
Mae’r drefn ymgeisio ychydig
yn wahanol i gyrsiau eraill. Mae Llawlyfr UCAS yn egluro hyn. Dylet
drafod hyn gyda dy diwtoriaid Celf fydd yn gallu dy helpu i benderfynnu
pa broses ymgeisio rwyt am ei defnyddio.
Cwblhau dy Ddatganiad Personol
|
