´óÏó´«Ã½

Mae'r prif weinidog David Cameron wedi gwadu honiad bod y Ceidwadwyr yn rhwystro datganoli mwy o bwerau i Gymru.

Dywedodd wrth ´óÏó´«Ã½ Cymru bod y syniad o Lywodraeth Cymru'n medru codi peth o'i chyllideb ei hun yn ddeniadol iddo.

Bron flwyddyn yn ôl fe ddywedodd Comisiwn Silk, a sefydlwyd gan Lywodraeth y DU, y dylai gweinidogion yng Nghaerdydd gael pwerau i newid rhai graddfeydd treth.

Roedd arweinydd y Democratiaid Rhyddfrydol a'r Dirprwy Brif Weinidog Nick Clegg wedi honni bod ymateb i argymhellion y Comisiwn wedi cael ei ddal yn ôl gan y Ceidwadwyr.

Disgrifiodd Mr Cameron rhyw fath o "swigen yng Nghaerdydd" oedd ag obsesiwn gyda phwerau'r Cynulliad, ond bod gan bleidleiswyr flaenoriaethau eraill gan gynnwys adfywio'r economi a'r gwasanaeth iechyd.

Mewn cyfweliad gyda ´óÏó´«Ã½ Cymru, wrth i'r Ceidwadwyr gynnal eu cynhadledd flynyddol ym Manceinion, dywedodd Mr Cameron:

"Mae'r syniad y dylai cynrychiolwyr Cymru feddwl am sut i godi arian yn ogystal â'i wario - fel Ceidwadwr sy'n credu bod angen i ni fod yn ofalus gydag arian cyhoeddus ac arian y trethdalwr - yn un deniadol.

"Rwy'n credu mai'r materion go iawn yng Nghymru nawr yw sut y gallwn adeiladu adfywiad economaidd. Ond wrth gwrs rhaid i ni setlo'r mater pwerau yma hefyd.

"Mae swigen yng Nghaerdydd gydag obsesiwn gyda phwerau tra bod pobl Cymru mewn gwirionedd am gael canlyniadau."

Gofynnwyd i Lywodraeth Cymru am ymateb.

Yn gynharach yn y mis, dywedodd Mr Clegg y byddai eisoes wedi cytuno i roi pwerau i newid graddfeydd treth pe bai e'n brif weinidog.