����ý

Gwnaeth Bruce Tuckman lawer o ymchwil i waith tîm effeithiol hefyd. Datblygodd y model datblygu grŵp.

Yn ystod ei ymchwil, sylwodd nad yw timau’n cychwyn fel uned gwbl effeithiol. Yn hytrach, er mwyn dod yn gwbl effeithiol, mae angen iddynt fynd drwy nifer o gamau.

1. Ffurfio – Dyma pryd mae aelodau’r grŵp yn cyfarfod ei gilydd am y tro cyntaf. Ni fydd llawer iawn o gynnydd yn cael ei wneud yn y cam hwn oherwydd bydd pawb yn canolbwyntio ar ddod i adnabod ei gilydd a cheisio creu argraff.
2. Stormio – Mae’n debygol bydd rhywfaint o anghytuno yn ystod y cam hwn. Bydd aelodau’r tîm yn cyfrannu syniadau, a bydd hyn yn profi gallu’r grŵp i gyfaddawdu a chytuno ar ffordd o symud ymlaen.
3. Normio – Ar ôl goresgyn unrhyw anghytundeb, mae’r cam hwn yn ymwneud â symud ymlaen a gwneud cynnydd. Dyma gyfle i roi rolau i wahanol aelodau o’r tîm os oes angen.
4. Perfformio – Dyma’r cam mwyaf cynhyrchiol. Mae’n anhebygol bydd anghytuno erbyn y cam hwn gan fod pawb yn gwybod beth mae’n ei wneud, ac erbyn hyn dylai’r tîm fod yn gweithio fel uned gwbl effeithiol.
5. Ailstrwythuro – Cafodd y cam hwn ei ychwanegu yn ddiweddarach ac mae’n disgrifio’r broses o ddod â’r profiad o weithio mewn tîm i ben a symud ymlaen at her newydd.

Effeithiolrwydd tîm

Mae cyflogwyr bob amser yn chwilio am bobl sy’n gallu gweithio’n effeithiol mewn tîm.

Mae llawer o swyddi’n galw am waith tîm, ac yn aml iawn bydd darpar gyflogwyr yn chwilio am enghreifftiau penodol o waith tîm i helpu i’w sicrhau y bydd unigolyn yn ffitio i mewn i’r sefydliad ac yn gwneud cyfraniad gwerthfawr.

Enghraifft bywyd go iawn

Mewn adroddiad gafodd ei gyhoeddi yn ddiweddar dywedodd Cymdeithas Siartredig yr Ysgolion Busnes mai gweithio mewn tîm yw un o’r sgiliau pwysicaf y mae cyflogwyr yn chwilio amdanynt.