����ý

Weithiau bydd nodweddion a chymeriad pobl yn amlygu eu hunain yn gryfach nag arfer mewn cyfarfodydd. Mae’n bwysig adnabod mathau penodol o bobl er mwyn dysgu sut i’w rheoli.

Yr un sy’n siarad gormod

Mae gan y person hwn ddigon i’w ddweud ac ef yw’r prif siaradwr yn y grŵp. Bydd tueddiad gan y person hwn i siarad dros bobl eraill.

Os bydd y broblem yn parhau, siarada gyda’r person y tu allan i’r cyfarfod. Eglura mai’r sefyllfa ddelfrydol os oes deg o bobl mewn cyfarfod yw bod pob person yn cyfrannu deg y cant. Bydd hyn yn sicrhau bod cyfranogiad pawb yn llawer mwy cyfartal.

Yr un sydd ddim yn siarad

Nid yw’r person hwn yn siarad mewn cyfarfodydd.

Un ffordd o ddelio gyda'r sefyllfa hon yw i'r cadeirydd ofyn cwestiwn penodol iddo mewn cyfarfod. Ffordd arall o ddelio gyda sefyllfa o'r fath, byddai siarad gyda’r person y tu allan i’r cyfarfod er mwyn egluro pa mor bwysig yw ei gyfraniad a’i farn.

Yr un sy’n crwydro oddi wrth y pwnc

Bydd y person hwn yn tueddu i grwydro oddi wrth y pwnc yn ystod y cyfarfod.

Bydd angen i’r cadeirydd sylweddoli bod hyn yn digwydd a dod â phawb yn ôl at y pwnc.

Yr un ansensitif

Mae'r person hwn yn debygol o roi cyngor nad yw’r grŵp ei eisiau. Bydd yn cymryd cyfraniadau pobl eraill yn ysgafn ac yn digio aelodau eraill o’r grŵp.

Mae angen siarad â’r person hwn yn fuan iawn. Mae angen ei atgoffa na fydd yn cael gwahoddiad i fod yn aelod o’r grŵp yn y dyfodol os bydd yn dal i ymddwyn fel hyn.