|
Materion emosiynol - Unigrwydd
Mae gadael cartref, gadael ffrindiau a mynd i goleg ymhell o gysur cartref yn anodd. Ond, fel arfer mi fydd dros 1000 o bobl yn yr un cwch â chi mewn prifysgol, pob un yn wynebu'r un pryderon ac ofnau. Mae'r ffrindiau rydych chi'n eu gwneud mewn prifysgol neu goleg yn debyg o fod yn ffrindiau oes sy'n rhannu'r un diddordebau a hoffi'r un gweithgareddau â chi.
"Beth os nad oes neb yn fy hoffi?",
"Beth os nad ydw i'n ffitio i mewn?",
"Sut mae cwrdd â phobl?"
Dyma rai o'r cwestiynau mae myfyrwyr yn eu gofyn wrth ddechrau ar addysg bellach.
Neuaddau Preswyl
Bydd y rhan fwyaf o fyfyrwyr y flwyddyn gyntaf yn cael cynnig lle mewn neuadd breswyl. Fe allan nhw fod yn neuaddau sy'n cynnig prydau parod, neu'n rhai hunan-arlwyo, yn neuaddau un-rhyw neu gymysg, wedi'u rhannu'n fflatiau neu mewn adeiladau enfawr. Mae myfyrwyr yn cael eu rhoi gyda phobl sy'n gwneud yr un cwrs â nhw neu sy'n rhannu'r un diddordebau cyhyd ag sy'n bosib, ac mae'n ffordd wych o gwrdd â phobl a gwneud ffrindiau. Ar eich noson gynta, ewch i roi cnoc ar ddrws eich cymdogion a'u hannog nhw i wneud yr un fath! Mae sawl prifysgol hefyd yn cynnig 'arweinydd cyfoed' neu system 'fentora' lle mae myfyriwr o'r 2il flwyddyn yn mynd â grwp o fyfyrwyr y flwyddyn 1af allan, eu cyflwyno i’r campws/y ddinas a'u hannog i wneud ffrindiau.
|
TIP
TANBAID!
|
Mae'n werth ichi yswirio'r eiddo sydd gennych chi yn eich ystafell os nad ydy wedi ei gynnwys ar yswiriant eich rhieni.
|
Wythnos y Glas
Wythnos o adloniant wedi'i drefnu gan undeb y myfyrwyr - y lle sy'n debyg o fod yn ailgartref ichi yn ystod eich cyfnod yn astudio. Mae'r Undeb yn cynnig amrywiaeth eang iawn o weithgareddau a digwyddiadau a fydd at ddant pob chwaeth gerddorol a diwylliannol. Mae'n lle gwych i gael diod neu ddau, sgwrs fach dawel, parti gwyllt, cyfarfodydd cymdeithasau neu ralïau gwleidyddol.
|
TIP
TANBAID!
|
Ceisiwch beidio â gwario eich arian i gyd yma (na threulio'ch amser i gyd chwaith)…cofiwch fod yn rhaid ichi wneud rhywfaint o waith!
|
Ffair y Glas
Mae'r ffair yn cael ei chynnal fel arfer yn ystod wythnos gynta'r tymor. Mi fydd pob clwb a chymdeithas yn mynd yno i ddenu aelodau newydd. Mae'n ffordd wych o gwrdd â phobl o'r un anian â chi neu ymuno â thîm sy'n rhedeg clwb. Mae'r dewis yn eang – o glybiau hwylio neu star wars i elusennau a grwpiau gwleidyddol. Yn ogystal, os nad ydych chi'n dod ar draws cymdeithas sydd o ddiddordeb ichi, gall yr Undeb eich helpu i sefydlu'ch cymdeithas eich hun. Mae Prifysgolion hefyd yn cynnal clybiau all fod yn uniongyrchol berthnasol i'ch gyrfa (er enghraifft papurau newydd, gorsafoedd radio, clybiau gwleidyddol, grwpiau gwirfoddoli yn y gymuned).
|
TIP
TANBAID!
|
Peidiwch â chael eich temtio i ymuno â gormod o gymdeithasau - cadwch at un neu ddau y gallwch chi gysegru digon o amser ac egni iddyn nhw!
|
Eich cwrs
Pa gwrs bynnag rydych chi wedi'i ddewis, fe wnewch chi gwrdd â phobl eraill, cael cyfle i wneud gwaith grwp neu waith seminar a chael cyfle i ymuno â grwpiau astudio academaidd. Mae hyn eto'n ffordd ardderchog i wneud ffrindiau. Wrth gwrs, mae sefyll mewn seminar a chyfrannu yn gallu bod yn brofiad brawychus, ond unwaith y cewch chi flas ar ddadlau bywiog, fe all fod yn hwyl, ysgogi'r meddwl a gwneud ichi feddwl mewn ffyrdd gwahanol. Does dim atebion cywir nac anghywir – felly ewch amdani!
|
TIP
TANBAID!
|
Os ydych chi'n teimlo eich bod chi ar y cwrs anghywir, dydi hi byth yn rhy hwyr i newid.
|
Crefydd
Bydd pob sefydliad addysg uwch yn cynnig ystod eang o weithgareddau crefyddol gydag addoldai ar gyfer pob enwad. Mae'r Caplandy yn agored i bawb, beth bynnag eu cred.
Cwnsela a'r lein nos
Os ydych chi'n ei chael hi'n anodd gwneud ffrindiau, yn teimlo'n unig neu'n isel, mae pob sefydliad yn cynnig cefnogaeth o bob math. Peidiwch â chladdu'ch pen yn y tywod na gadael cyn gorffen eich cwrs. Ewch i gael gair â rhywun all helpu. Mae pawb yn teimlo'n unig ac allan o'u dyfnder o bryd i'w gilydd, ac nid arwydd o wendid ydy mynd i ofyn am gyngor. Naill ai ewch i weld y swyddog lles myfyrwyr neu gael sgwrs wyneb yn wyneb gyda chwnselwr, neu ffonio'r 'Lein Nos' – myfyrwyr eraill fydd ar ben arall y lein ac mae pob sgwrs yn gwbl gyfrinachol a does dim raid i neb roi ei enw. Mae'r gwasanaeth yma i'w gael ym mhob prifysgol.
Pryderon eraill:
Arian | Unigrwydd | Delio gyda'r baich gwaith | Rhyw a Iechyd | Dewis y Cwrs Iawn, Dewis y Lle Iawn | Gyrfa
Ìý
|
