����ý

Gan fod y ddrama wedi ei gosod yng Nghaernarfon, fe fyddwn i’n gwybod ar unwaith y byddai’r cymeriad fwy na thebyg yn siarad gydag acen ogleddol benodol y ‘Cofi’ (oni bai fod y dramodydd wedi nodi bod y cymeriad yn dod yn wreiddiol o rywle arall).

Mae’r cymeriad yn ei arddegau felly byddai cywair y llais yn ysgafnach ac yn feddalach, heb fod mor ddwfn ac aeddfed â rhywun hŷn.

Mae personoliaeth y cymeriad yn cael ei ddisgrifio’n bersonoliaeth ‘bwdlyd’ sy’n golygu y bydd ei hwyliau’n siŵr o amrywio’n sylweddol o olygfa i olygfa. Byddai fy newisiadau’n adlewyrchu hyn. Byddai’r llais yn uwch ac yn sgrechlyd pan fyddai’r cymeriad yn flin ac yn is ac yn fwy o fonoton os ydy’n pwdu. Mae’n hawdd cael eich temtio i fwmial a cholli ynganiad wrth bortreadu rhywun yn ei arddegau. Gallai’r cymeriad fod yn ddiog yn y ffordd mae’n siarad, ond rhaid peidio â cholli ynganiad cywir neu bydd y gynulleidfa’n methu clywed y ddeialog yn iawn.

Gan fod y ddrama’n gomedi, fyddai hwyliau drwg y cymeriad ddim yn datblygu i fod yn drasiedi tywyll felly byddai’n rhaid i’r dehongliad lleisiol cyffredinol sicrhau bod y comedi’n cael ei fynegi i’r gynulleidfa. Gallai nodweddion lleisiol penodol helpu gyda hyn, megis ochneidio’n faith a thwtian wrth ymateb i gymeriad sy’n oedolyn.