 |
 |
Tair Cymraes yn Awstralia
Bu Sarah Marion Jones sy'n dod o Lanbedrog ger Pwllheli yn teithio yn Awstralia efo Lisa Charles o Lanuwchllyn a Sian Jones o'r Frongoch ger Y Bala. Sarah sy'n dweud eu hanes yn hela moch gwyllt yn nhywyllwch nos.
|
Hela moch gwyllt
Dim ond pedair fflachlamp oedd ganddom y noson honno.
Gwirion braidd o gofio fod yna ddeg ohonom i gyd ac i'r hogia fynd efo'r golau i gyd a'n gadael ni'r genod yn sefyll mewn clwstwr yng nghanol cae yn holi'n gilydd, "Are there snakes here?"
"Probably".
Canol Ionawr oedd hi a ninnau yn nhref Bingara ar lannau Afon Gwydir yn nhalaith New South Wales.
Yma mae canolfan farchogaeth felly roeddwn i a Lisa yn awyddus i aros am wythnos.
Bob bore byddai'r perchnogion, John a Cathy, yn mynd â chriw ohonom ar gefn ein ceffylau am reid ar hyd ochr y dwr, gan stopio i nofio ar y ffordd.
Adar yn sgrechian
Profiad bendigedig oedd mynd drwy'r coed lle roedd parotiaid yn hedfan uwchben a'r Kukaburra yn sgrechian.
Ar y dydd Llun cawsom noson wirioneddol Aussie-wledig gyda gwahoddiad i fynd am farbeciw i dy Mick - mab John a Cathy - a'i gariad. Roedd criw o tua 10 ohonom, oll yn backpackers o bob rhan o'r byd.
Byrgyrs a snags
Wedi stwffio'n hunain ar fyrgers a snags dyma benderfynu mynd i hela moch gwyllt
Mae hwn yn arferiad digon cyffredin mewn ardaloedd gwledig gan fod moch gwyllt yn bla sy'n malu tir ac eiddo ffermwyr.
Dangosodd Mick ei albwm lluniau o helfeydd inni - roedd fel heliwr saffari yn dangos ei trophies.
Roedd hi wedi deg y nos arnom yn cychwyn ac wedi tywyllu ers meitin. Neidiodd pawb i'r ute (cerbyd gwaith) ac i ffwrdd a ni ar hyd lonydd bychain, garw, a thrwy gaeau cymdogion Mick.
Golau spotlight ar dop y cerbyd a ddefnyddiwyd i chwilio am y bwystfil ac er inni ddychryn cannoedd o gangarws 'doedd yna dim golwg o fochyn gwyllt.
Ond yn sydyn aeth y pedwar ci yn lloerig! Roeddem ar y trywydd iawn!
Gadawsom yr ute ar ochr y ffordd gan redeg ar ôl y cwn ar draws caeau a'r gwair tal yn cyffwrdd fy wyneb a'r cyfarth yn atsain dros bobman. Nid wyf erioed wedi teimlo'r ffasiwn ofn or blaen - ond roedd y cynnwrf yn fy ngwthio ymlaen.
Yn y tywyllwch mewn cae
A dyna pam roeddwn i a Lisa yn sefyll mewn cae efo dieithriaid, yn methu gweld dim pellach na'n trwynau yn gweddio na fuasai'r Death Adder na 'run o'i chefndryd dychrynllyd yn galw heibio y noson honno.
Er i'r hogiau ein gadael am beth oedd yn teimlo fel oriau, ddaliwyd dim byd ac roedd y siom yn amlwg ar wyneb Mick - heb luniau i'w hychwanegu at ei albwm!
Wrth yrru'n ôl i'n llety am 1.30 yn y bore roeddwn i a Lisa yn chwerthin wedi noson mor ryfeddol.
Ac i goroni'r cyfan, roedd yn noson serog, glir a phetawn i ond wedi gallu ymestyn y mymryn lleiaf ymhellach buaswn wedi cyffwrdd y Southern Cross a'r sêr eraill.
|
|
