����ý

Mae modd defnyddio Theatr Gorfforol yn y ffordd y cafodd ei defnyddio gan y cyfarwyddwr Steven Berkoff yn The Trial, i osod yr olygfa, boed ar gyfer dodrefn mewn ystafell neu stryd brysur. Mae defnyddio pobl i greu popeth ar y llwyfan yn caniatáu cyfleoedd gwych ar gyfer effaith ddynamig. Yn The Trial, y cast, fframiau syml iawn a rhaff ar ardal berfformio wag oedd y cyfan a ddefnyddiwyd i greu'r llwyfannu. Byddai llwyfan gwag yn ddelfrydol i rai perfformiadau Theatr Gorfforol.

Dychmyga gynhyrchiad o ddrama Shakespeare, Macbeth. Fel arfer rydyn ni'n clywed am y frwydr ar ddechrau'r ddrama. Sut fyddai gweld yr ymladd yn effeithio ar y cynhyrchiad? Gallai hyn fod mewn dull arddulliedig, gyda’r gwrachod yn amlwg yn rheoli'r digwyddiadau fel pe baen nhw'n bypedwyr. Canmolwyd cynhyrchiad Kenneth Branagh o Macbeth yn 2013 am ei natur gorfforol, yn enwedig yn ystod golygfa'r frwydr ar ddechrau'r ddrama.

Cyfuno arddulliau drama

Mae Theatr Gorfforol yn canolbwyntio ar symud ond gall fod ar wahân i’r gair llafar neu uno â'r gair llafar i ehangu ac ymchwilio i’w ystyr. Gall fod yn ddyfeisiedig neu gynnwys elfennau sylweddol y tu hwnt i sgript wedi ei argraffu. Gallai'r elfennau hyn fod yn ffurfiau celfyddydol eraill megis cerddoriaeth, dawns, defnydd o gyfryngau neu ddelweddau gweledol. Rwyt ti’n gallu defnyddio propiau sy’n gweddu i natur y cynhyrchiad hefyd. Mae gwisgo mwgwd yn ffordd dda o ymarfer technegau Theatr Gorfforol oherwydd rhaid i ti weithio dy gorff yn effeithiol i wneud yn iawn am y diffyg mynegiant pan fydd dy wyneb wedi ei guddio. Felly gallet ti ddefnyddio cyfuniad o elfennau gyda’r sgript. Beth am estyn allan at y gynulleidfa mewn ffordd sy'n herio'r bedwaredd wal, gan wneud y gynulleidfa yn gyd-gynllwyniwr yn y ddrama? Dydy hi ddim yn anarferol i Theatr Gorfforol annog neu fynnu cyfranogiad gan y gynulleidfa.

Roedd cynhyrchiad amlieithog y Theatr Genedlaethol, Rhwydo/Vangst, yn ddarn o Theatr Gorfforol wahanol i'r arfer. Roedd y cynhyrchiad yn defnyddio cyfraniadau gan aelodau o'r cyhoedd a oedd wedi nodi eu gobeithion a'u hofnau a'u 'postio' i flwch cyn y perfformiad. Yna roedd y cynnwys hwn yn cael ei drosglwyddo i recordiad sain a gafodd ei chwarae wrth i'r ddau berfformiwr, yr artist meim Anne van Balen a'r dawnsiwr, Fabián Santarciel de la Quintana, roi perfformiad mud yn y blwch. Roedd y cyfle i gyfrannu'n uniongyrchol at y cynhyrchiad yn cyffroi cynulleidfaoedd mewn nifer o wledydd.