Briseadh-cridhe eile do sgioba na h-Alba
"Briste agus duilich a chreidsinn"
Airson an treasamh turas ann an sreath, cha bhi sgioba nam ban aig Alba a' gabhail pàirt ann am farpais mhòr.
Rinn an Fhionnlainn a' chùis orra Dimàirt 2-0 ann an Helsinki - rud a chuir crìoch air an dòchas aca cluich aig Farpais na h-Euros ann an 2025.
Uair eile, feumaidh na h-Albannaich dèiligeadh ri pian a tha iad air fhaireachdainn grunn thursan ron a seo agus 's dòcha earbsa a chur ann an linn ùr don sgioba nàiseanta.
Pedro Martinez Losa
Tha àrd-choidse na h-Alba, Pedro Martinez Losa, ag ràdh gu bheil e dìleas do a chluicheadairean, gu bheil cùmhnant aige fhathast agus nach eil adhbhar aige a dhreuchd fhàgail.
Ach tha e air a bhith fo chuideam airson ùine fhada - chan ann a-mhàin air sgàth 's gu bheil an sgioba air a bhith a' strì aig amannan, a dh'aindeoin cho tàlantach sa tha an sguad. Ach cuideachd air sgàth stoidhle a' bhuill-choise aige.
Thàinig iomairt Lìog nan Nàiseanan gu crìoch ann an 2023 le droinneadh de 6-0 an aghaidh Shasainn agus thuirt Martinez Losa às dèidh làimhe gun robh e an dùil na cluicheadairean aige a stùireadh gu Farpais na h-Euros 2025.
Feumaidh gun robh Buidheann Riaghlaidh Ball-coise na h-Alba a' creidsinn gur e esan an duine às fheàrr airson sin a choileanadh nuair a chuir iad os cionn na sgioba e às dèidh dhaibh fàiligeadh air àite fhaighinn aig an aon fharpais trì bliadhnaichean air ais - agus fiù 's ro Lìog nan Nàiseanan ann an 2023 nuair a chuir iad ceithir bliadhnaichean ri a chùmhnant.
Chaill iad a-mach air àite aig Cupa na Cruinne dà bhliadhna air ais nuair a thàinig Poblachd na h-Èireann am bàrr nan aghaidh ann an cuairt dheireannach am playoff aca.
Agus às dèidh an dà gheama an aghaidh na Fionnlainn, tha ceist uair eile aig an luchd-taic am bu chòir dha fuireach na dhreuchd.
"Ceistean mòra"
"Nam biodh an dearbh rud air tachairt ann an sgioba eile, gu h-àraid air taobh nam fear, bhiodh ceistean mòra air a' mhanaidsear - agus chan eil an aon uallach [ann an geama nam ban]t," thuirt Seona Nic'illeFhionndag a bhios a' leantainn sgioba nam ban aig Alba air Aithris na Maidne.
"Tha mi a-riamh air a bhith ag ràdh nach eil na cluicheadairean aig Alba air a bhith a' cluich cho math ri cho luachmhòr sa tha iad."
"'S e a' cheist a th' ann, a bheil sin a' laighe aig doras a' mhanaidseir mur nach urrainn dha na puingean (fhaighinn) agus faighinn gu na farpaisean leis an sguad a th' aige," thuirt Seona.
Tòisichidh Alba iomairt ùr sa Ghearran an ath-bhliadhna ann am buidheann A de Lìog nan Nàiseanan far a bhios An Ostair, a' Ghearmailt agus an Òlaind còmhla riutha.
Ciamar a thogas Pedro Martinez Losa sunnd nan cluicheadairean aige airson cluich an aghaidh cuid dhe na sgiobaidhean as treasa san Roinn Eòrpa? No an e uallach cuideigin eile a bhios ann?
