Na Staggies ann an sunnd
Thòisich Ross County 2025 le brag is iad a' buannachadh 2-1 aig Pittodrie.
Às dèidh dhaibh a dhol 15 mìosan gun geama a bhuannachadh air falbh bhon taigh san lìog, tha na Staggies a-nise air a dhà a bhuannachadh ann an sreath.
Le puing an aghaidh Hearts ann an Inbhir Pheofharain eadar an dà gheama sin, tha County a-nise ann an suidheachadh nas fheàrr san lìog is iad seachd puingean air thoiseach air St Johnstone a tha aig a' bhonn.
'S e feasgar dùbhlanach a bh' ann dhan dà sgioba san Ear-Thuath Diardaoin is sneachd a' laighe air a' phàirc.
Bha coltas ann gun robh County gu math nas chofhurtaile na Obar Dheathain is bha iad airidh air a dhol air thoiseach le rocaid bho astar bho Akil Wright às dèidh 24 mionaidean.
Cha do ghabh Nohan Kenneh County sàr chothrom às dèidh sin gus County a chur nas fhaide air thoiseach air a' chiad gheama aige bho th, taobh a-muighìll e dhan chluba air iasad bho Hibs, taobh a-muigh.
Bha Obar Dheathain an uairsin co-ionnan dìreach ro lethach slighe.
'S e fìor dhroch mhearachd a bh' ann bho Jordan Amissah eadar na puist do Chounty is e a' fàilligeadh air greim a chumail air breab-saor bho Kevin Nisbet.
Chuir sin spionnadh air choireigin anns na Dons is thòisich iad an dàrna leth gu làidir is County taingeil do dh'Amissah 'son an geama a chumail aig 1-1.
'S iad sgioba Inbhir Pheofharain ge-tà a chuir an tadhal a bhuannaich an geama.
Cha robh e follaiseach an robh Noah Chilvers a' feuchainn air an targaid no dìreach am ball a chur sa mheadhan ach chaidh e àrd os cionn Ross Doohan gus an geama a bhuannachadh do Chounty.
"Air ar dòigh dà gheama air falbh a bhuannachadh ann an sreath às dèidh dhuinn feitheamh cho fada", thuirt leas mhanaidsear Chounty Carl Tremarco.
"Bha sinn fìor mhath sa chiad leth is 's e briseadh-dùil a bh' ann a bhith a' tighinn a-steach aig 1-1.
"'S e deuchainn a bha sin is bha sinn fortanach aig amannan san dàrna leth ach rinn sinn e. Bha sinn airidh air".
Chan eil mòran fois aig na Staggies is iad air an rathad a-rithist Didòmhnaich le geama an aghaidh Cill Mheàrnaig.
Ron a sin tha geama aig sgioba eile na Gàidhealtachd Disathairne is Caley Thistle gus fàilte a chur air Dùn Bhreatainn ma cheadaicheas an t-sìde.
'S e geama cudromach a th' ann do dh'ICT às dèidh dhaibh call 4-1 an aghaidh Cove an t-seachdain seo chaidh.,
Tha sin a' ciallachadh nach eil Dùn Bhreatainn a-nise ach trì puingean air cùl Inbhir Nis aig bonn na lìge.
