´óÏó´«Ã½

Pe bawn i'n gosod tanjyrîns yn hosanau Nadolig ein merched ni heddiw, yn yr oes fodern hon, afraid dweud na fyddai'r ffrwyth yn eu cyffroi o gwbwl. Nid 'waw' fyddadi eu hymateb, yn sicr, ond "o Mam!"

Aeth yr hyn a oedd ar un adeg yn foethusion, yn bethau cyffredin bob dydd i blant ein hoes. Maent yn gyfarwydd â gweld llond bowlen o danjyrîns wedi eu gorseddu ar fwrdd y gegin trwy'r flwyddyn. Felly, pa fath o drêt fyddant yn eu derbyn yn eu hosan Nadolig? Byddai'n siŵr o 'grampio' eu steil ymhlith eu ffrindiau soffistigedig!

Nid ydynt yn rhyfeddu heddiw at y pethau y bu plant y cenedlaethau o'u blaen yn rhyfeddu atynt. Mae creu rhyfeddod ar wyneb plant ein dyddiau ni yn beth dychrynllyd o gostus! Ond dyna ni, nid plant bach yn unig sydd wedi stopio rhyfeddu. Gŵyr rhai ohonom am blant mawr, hefyd.

Testun rhyfeddod yw Gŵyl y Nadolig. Rhyfeddu bod Duw wedi dod mewn baban i'n byd, a bod Duw yr Imaniwel yn Dduw sy'n agos atom ni, trwy ei fab Iesu Grist.

Ble aeth y waw o'n geirfa, wrthi ni fyfyrio ar hanes Y Nadolig? A ydym wedi dod yn rhy gyfarwydd â'r stori, fel nad yw yn ein rhyfeddu mwyach? A phwy sy'n dal i ddweud mai Gŵyl i'r plant yw'r Nadolig? 'Mae'r Nadolig yn ŵyl i bawb.

Ble aeth rhyfeddod yr ŵyl?

Wedi i'r bugeiliaid gyrraedd crud y baban Iesu, ac adrodd yr hyn a ddywedwyd wrthynt gan yr angylion, 'rhyfeddod pawb a'u clywodd' ...

Rydym yn rhyfeddu ddigon wrth glywed am y newyddion drwg sy'n parlysu cymunedau a chynhedloedd ein byd. Rhyfeddwn o weld ar ein setiau teledu, ddelweddau erchyll sy'n taflu cysgodion hyll ar draws ein byd, ac yn portreadu'r casineb sydd yng nghalonnau ein cyd-ddyn heddiw.

Ond dyma gyfle adeg yr ŵyl arbennig hon, i ni ryfeddu wrth glywed am newyddion da, am Un a ddaeth i fod yn Dywysog Tangnefedd.