Briosgaidean Impireachd Liomain is Teile
Nì seo 8 briosgaidean
An slamag
85g ìm
225g siùcar mìn
3 teilean (rùsg agus sùgh)
2 ugh
Na briosgaidean
150g ìm saillte
50g siùcar mìn
1 spàin-tì brìgh vanilla
Rùsg liomain
200g flùr plein
Còmhdach
100g siùcar pùdar
Sùgh liomain
Suiteas liomain neo teile airson a mhullaich
‘S e dreach ùr, eadar-dhealaichte a seo air na briosgaidean traidiseanta is aithne dhuinn uile. Ach, seach silidh sa mheadhan tha slamag tiugh buidhe air bhlas teile.
‘Son an slamag cuir an t-ìm, an t-siùcar agus an rùsg is sùgh à na teilean ann am bobhla. Tha seo ga leaghadh air uachdar pana le uisge a goil air a shocair.
Bheir am bobhla far an teas agus leig leis fuarachadh beagan mhionaidean. Cuir a-nis dà ugh slàn a-staigh agus buail gu math.
Till am bobhla dhan phana air an stòbh agus bruich gus am fàs e tiugh is uachdrach, ga bhuaileadh fad an t-siubhal. Bithidh seo suas ri 10 mionaidean.
Tha gu leòr a seo airson dà chrogan bheag – glèidh a dara leth ann an seann chrogan silidh air a dheagh ghlanadh le uisge goileach, agus cùm an còrr airson a chur eadar gach dà bhriosgaid.
Airson na briosgaidean cuir an t-ìm, an t-siùcar, am brìgh vanilla agus an rùsg liomain ann am bobhla. Buail seo uile còmhla gu math. Nuair sin tha am flùr a dol ann agus thathar ga bhualadh gu math a-rithist. Thig e ri chèile coltach ri mìrean-arain. Le làimh, brùth seo uile ri chèile feuch ach dèan thu ball taoise dhe.
Son ochd briosgaidean dùbailte, feumar an taois a’ rolaigeadh a-mach gu cairteal òirlich ann an tighead. Rolaig eadar dà phìos pàipear-fuine an taois – nì seo an gnothach gu math nas glaine. Geàrr sia briosgaidean deug às, gach briosgaid trì òirlich tarsainn.
Dhan àmhainn-gaoithe leotha aig 160C airson 10 mionaidean. Nuair a thig na briosgaidean às an àmhainn sgaoil air racais uèir iad gus am bì iad buileach fuar.
An t-àm airson an lìonadh - spàin dhen slamag air bonn a' bhriosgaid is tha briosgaid eile a' suidhe air muin sin.
Nuair a tha ochd phaidhrichean de bhriosgaidean deiseil còmhdaich iad le measgachadh tiugh dhan t-siùcar còmhdaich is sùgh liomain.
Tha suiteas beag buidhe a' suidhe am meadhain mullaich gach briosgaid.
Briosgaid brèagha, buidhe agus brisg le slamag tiugh milis. Cha dèan aonan an gnothach idir…
