|
Efallai y byddwch yn cofio hefyd, bod Dafydd yn unig fab i Alice a William Arthur Davies, ac yn nai i David Davies, Siop Pantglas. Bydd rhai yn ei gofio yn ddisgybl yn Ysgol Sir Bethesda ('Y Cownti') ac efallai'n cofio mai Dafydd oedd y disgybl cyntaf yn Sir Gaernarfon i ennill ysgoloriaeth i astudio yng Ngholeg Celf Lerpwl. Ond tybed faint ohonoch sy'n gwybod beth fu ei hanes wedyn? Mae'n bleser gan y Llais adrodd ychydig o'i hanes ac yntau bellach yn arlunydd o fri, ac ar fin cynnal arddangosfa o'i waith yn Llanberis.
Wedi gorffen ei gyfnod o 'Wasanaeth Cenedlaethol' ei swydd gyntaf oedd gyda'r Daily Mail yn Llundain, ble bu'n aelod o dîm oedd yn gyfrifol am ddylunio ac adeiladu'r 'Ideal Home Exhibition' yn Olympia, Llundain. Symudodd wedyn i gymryd swydd fel Prif Ddylunydd gyda chwmni Marley Tile yn Swydd Caint.
Yn 29 mlwydd oed dychwelodd i ogledd Cymru, ac am y 13 mlynedd ef oedd y prif ddylunydd yn Bernard Wardle, Peblig, Caernarfon. Yn ystod y cyfnod yma bu'n byw yn Eithinog, Bangor, ac fe fu'n aelod o Gôr Meibion Ferodo, Caernarfon. Gadawodd ardal Bangor gan ymgartrefu yn Wilmslow, Sir Caer pan apwyntiwyd ef yn Gyfarwyddwr Gwerthiant gyda
Standex International yn Stockport.
Mae Dafydd yn briod â Stella, ac mae ganddynt ddwy ferch, Gwyneth a Karen, ynghyd â 5 o wyrion a wyresau. Mae Dafydd bellach wedi ymddeol ac yn byw yn Biddenham ger Bedford.
Treulia Dafydd y rhan fwyaf o'i amser yn paentio tirluniau o ogledd Cymru. Mae'n arbenigo mewn gweithiau acrylic, ac wedi cynnal llawer o arddangosfeydd o'i waith mewn gwahanol fannau, gan gynnwys Theatr Clwyd, Yr Wyddgrug.
Gwelir enghreifftiau o'i waith mewn aml i gasgliad personol erbyn hyn yn ogystal ag ar gardiau cyfarch a werthir ledled Cymru.
Dymunwn bob llwyddiant i Dafydd gyda'i arddangosfa nesaf o dirluniau gogledd Cymru a gynhelir yn Oriel y Mynydd Gwefru, Llanberis o Ebrill 12 hyd Mai 16.
 |
Ìý
