´óÏó´«Ã½

Dymunwn bob llwyddiant iddynt yn ystod 2007, a hefyd i'r holl fusnesau presennol sy'n gweithredu yn yr ardal. Mae'n bwysicach nag erioed ein bod, fel trigolion, yn cefnogi ein masnachwyr lleol. Dymuniadau da hefyd i Mary a Richard Owen (Bers) sydd bellach wedi cymryd tenantiaeth y 'King's Head', ar ei newydd wedd.

Newyddion da hefyd yw cael gwybod bod cynlluniau ar y gweill i adeiladu 'Canolfan Iechyd' newydd i'r ardal, fydd yn cynnwys meddygfa a fferyllfa yn ogystal a gwasanaethau amrywiol eraill yn ymwneud ag iechyd. Mae'r ganolfan newydd i'w hadeiladu ar y tir o flaen y Clwb Rygbi, ym mhen draw Ffordd Stesion. Mae'n gynllun uchelgeisiol sy'n mynd i weddnewid y gwasanaeth yn Nyffryn Ogwen. Gobeithir gallu cynnwys copïau o'r cynllun yn y Llais fis nesaf. [Gol.]

Newyddion drwg
Mae 'Banc Lleol y Byd', yn ôl broliant HSBC eu hunain, wedi penderfynu troi cefn ar drigolion a busnesau lleol Dyffryn Ogwen.

Maent wedi cyhoeddi y byddant yn cau drysau eu cangen ym Methesda am y tro olaf ar Chwefror 27. Golyga hyn na fydd gennym fanc o gwbl i'n gwasanaethu o fewn y dyffryn - ac mae llawer iawn o bobl yn gandryll gyda HSBC oherwydd hyn.

Mae Cyngor Cymuned Bethesda yn teimlo'n gryf iawn ar y mater, ac fe anfonwyd dirprwyaeth o dri chynghorydd, sef Ann Williams, Godfrey Northam a Neville Hughes i gyfarfod y rheolwr, Mr Phil Hughes, i ofyn os oedd modd i'r banc ail-ystyried eu penderfyniad, ac efallai agor am lai o oriau.

Yr ateb a gafwyd oedd bod y penderfyniad i gau wedi ei wneud ac yn ddi-droi'n ôl. Mae Cyngor Cymuned Bethesda wedi cefnogi banc lleol bob amser ond yng ngoleuni'r sefyllfa ddiweddaraf bydd y Cyngor yn rhoi ystyriaeth ddwys i'w drefniadau bancio yn y dyfodol.

Mae 'na rai wedi bod yn ymgyrchu'n frwd yn erbyn cynlluniau'r HSBC gyda Mrs Gina Griffiths, Caffi Ogwen, wedi trefnu deiseb sydd a rhai cannoedd o enwau arni eisoes.