Pan ydych yn byw dramor mae ymweliadau "adref" yn hyfryd - a blinedig.
Dechreuodd ein trip gyda phenwythnos gyffrous yn Llundain yn gwylio fy chwaer yng nghyfraith, Sioned, yn cystadlu yn "showdown" Can't Sing Singers ar 大象传媒 1.
Cynrychioli Caerdydd yn erbyn Llundain, Lerpwl a Birmingham oedd Sioncs ac wedi cyflawni gwyrthiau gyda'r grŵp o gantorion fu hi'n eu dysgu.
Wyddai hi ddim fod Rod yn hedfan nôl i Brydain hefyd felly pan gafodd gip arno yn y gynulleidfa bu bron iddi a chael haint, druan.
Roedd y cystadlu yn frwd a wedi'r pleidleisio cyhoeddodd cyflwynwraig y sioe, Lorraine Kelly, mai Birmingham gipiodd y wobr gyntaf.
Serch hynny, dim ond deg pleidlais oedd rhwng Caerdydd a Birmingham felly fe wnaeth criw Sioned yn rhagorol.
Ciciwr pêl i'r dyfodol
Wedi penwythnos o joio yn Llundain roedd hi'n bryd bwrw am yr oerni go iawn yn yr Alban gan aros gyda fy chwaer, Lowri, ei gŵr John a'r plant, Beca Lia a Joni.
Roedd hi'n dipyn o sioc cyrraedd Glasgow a hithau wedi bod tua 23 gradd yn HK ond yn braf treulio amser gyda'r rhai bach a rhyfeddu gymaint mae plentyn newid mewn saith mis.
Mae Joni, sy'n ddwy, yn chwarae pêl-droed gystal â phlentyn chwech oed erbyn hyn a'i sgiliau da'r bêl yn gwbl anghredadwy.
Os na fydd y plentyn 'hwn yn chwarae i Gymru, fel ei dad, ac yn bêl-droediwr proffesiynol fydd yna'r un plentyn yn gwneud hynny.
Diwrnod hudolus
Wedi ffarwelio â'r criw Albanaidd, roedd hi'n fater o neidio ar awyren arall i Gaerdydd cyn gwneud ein ffordd lawr i Landysul ar gyfer y Nadolig ei hun.
Roedd y diwrnod yn gwbl hudolus gyda llwyth o eira fel pe byddem mewn ffilm o Hollywood!!
Clywed am y dinistr
Ond erbyn deffro bore trannoeth roedd yr awyrgylch yn gwbwl wahanol wrth gwrs wedi inni glywed am y dinistr yn Asia.
 Roeddem yn teimlo'n hollol syfrdan wrth wylio'r lluniau ar y teledu a gwyddwn am sawl person o HK oedd yn treulio'r Nadolig yn Indonesia a Thailand.
Wedi sawl neges destun roeddwn yn falch o glywed eu bod nhw'n saff.
Serch hynny, roedd ein calonnau ninnau, fel gweddill y byd, yn gwaedu am y rheini oedd yn dioddef.
Wedi dod nôl i HK fe darodd y sefyllfa fi hyd yn oed yn waeth.
Roeddwn yn cyflwyno sioe ar radio. 3 ar dydd Calan o naw tan un gyda'r prif westai, Nury Vittachi, yn dod o Sri Lanka ac yn adnabod sawl person oedd wedi colli ei fywyd yno.
Wrth gwrs, roedd hi'n gwbwl amhosib cyflwyno sioe hapus yn llawn o hwyl a sbri y calan gyda'r fath ddigwyddiad ar riniog ein drws.
Mae athrawon Ela (pump i gyd) hefyd yn dod o Sri Lanka ac, yn naturiol ddigon, roeddem ni rieni plant yn poeni'n ddifrifol am eu diogelwch.
Diolch i'r drefn dychwelodd pawb yn ddiogel i HK.
Straeon erchyll
Ar y llaw arall, mae straeon erchyll yn eich cyrraedd yn ddyddiol.
Gan fod Thailand mor agos i HK mae'n lle poblogaidd dros ben ar gyfer ex-pats - yn enwedig dros gyfnod Nadolig a'r Calan Chineaidd.
Clywais ddoe am deulu Ffrengig o dad, mam a phum plentyn o Stanley wedi mynd am y Dolig - ond dim ond mab 12 oed achubwyd rhag y tsunami!
 Ac nid oes amheuaeth y bydd myrdd o straeon tebyg yn ein taro dros y dyddiau nesaf.
Gall natur fod yn greulon iawn weithiau.
Ar drothwy blwyddyn newydd fel hyn ni allaf ond gweddio a gobeithio y caiff y bobl hyn i ail afael yn eu bywydau a dod drwyddi.
Falle na welwn ni mo hynny'n digwydd yn ystod ei hoes ni - ond fe ddown nhw drwyddi.
|
