 |
 |
Rhamant byd duwies y pysgotwyr
Beks yn ymweld â Macau am y tro cyntaf.
ER nad oes lle'n byd tebyg i Honkers, bois bach, mae'n braf cael dianc o'r ynys yn achlysurol - a dyna wnes i ddydd Sul.
|
Dianc i rywle Ewropeaidd ei naws gydag adeiladau Sbaenaidd eu natur a'r strydoedd gydag enwau Sbaeaidd-Bortiwgeaidd fel Estrada Cachilas ac Avenida de Amizde.
A dim ond awr o daith sydd yna i'r lle anghysbell hwn ar yr hydrofoil o Central HK.
Na, doedd dim angen hedfan deuddeng awr er mwyn blasu'r gymysgedd o'r bywyd hwn a diwylliant Chineaidd ym Macau sy'n gymysgedd wirioneddol unigryw o'r gorllewin a'r dwyrain.
 Adlais o enw'r dduwies, A-Ma sydd yna ym Macau a hithau'n cael ei haddoli gan bysgotwyr o ardaloedd Guandong a Fujian yn ne China.
Taflu fy hun i'r môr
Rhyngddo chi a fi, roedd gwir angen help y dduwies arnai ar y daith draw a bu bron imi â thaflu fy hun i'r môr sawl tra gan fod dyn y tu ôl imi a dynes y tu blaen imi - yn chwydu i fagiau plastig. Pleserus tu hwnt am 8.00 ar fore Sul!
Ta beth wnaeth hyn ddim effeithio ar fwynhad criw pêl-droed ar ei ffordd i chwarae ac wrth eu boddau yn stwffio noodles a Chickens' feet i lawr eu gyddfau.
Er fy mod innau'n awr yn bwyta reis a nwdls i frecwast yn achlysurol does gen i ddim awch cael traed yn fy mol beth cyntaf yn y bore!
Gweithdai drama
Wedi'r daith anturus roedd hi'n braf cael cyrraedd tir Macau a wyneb cyfarwydd yn y porthladd yn fy nisgwyl.
Fe gytunias fynd i ysgol iaith Jindou i gynghori'r athrawon yno sut i redeg gweithdai drama gyda phlant Chineaidd lleol.
Bwraid y gweithdai ydy gwella Saesneg y plant a'u meistrolaeth o'r iaith.
Roeddwn wedi cwrdd Mary Lou, un o'r athrawon yn y coleg, droeon yn HK.
Mae ganddi hi wreiddiau Sbaenaidd-Bortiwgeaidd yn ogystal â Philipino ac felly wrth ei bodd yn dangos uchelbwyntiau'r lle imi ar y ffordd i'r ysgol.
Golff a chasinos
Os ydych chi'n berson gamblo/golffio dyma'r lle i chi gan fod yma lwyth o gasinos a rhai o feysydd golff mwyaf bendigedig y byd!
Ar fy ffordd i'r ysgol teimlwn fy mod mewn ychydig o time warp ac heb lawer o syniad ym mha ran o'r byd oeddwn i er nad oeddwn ond ychydig filltiroedd o HK.
Cefais groeso bendigedig gan y staff yn Jindou sydd yn gwybod bellach am Sali Mali gan imi ddefnyddio rhai o lyfrau Ela fel enghreifftiau o'r hyn y gallwch ei wneud â llyfrau ac ati.
Ni wyddai'r criw yr oeddwn yn ei ddysgu fod yna'r fath iaith âr Gymraeg, felly galllwch ddychmygu faint o gwestiynau gefais i dros goffi canol bore!
Sôn am Spanish inquisition!
Roedd y criw yn frwdfrydig, eiddgar, er ychydig yn swil, sy'n rhywbeth cyffredin iawn ymhlith y Chineaid.
Rwy'n gwir gredu iddyn nhw ddysgu llawer a mwynhau y sesiwn drama gan fod yna lawer o chwerthin a chymeradwyo ar y diwedd gan brofi imi wneud rhywbeth yn iawn mae'n rhaid!!!!
Bwyd traddodiadol
Wedi'r diwrnod llwyddiannus hwn roedd rhai o'r athrawon yn awyddus i ddangos eu diolch drwy goginio pryd Macaneaidd imi yn eu cartref a doeddwn innau ddim yn mynd i ddadlau ynglyn â hynny.
 Felly bant â fi ar y tram i dy Peggy am Galinha Africana - cyw iar o Affrica gyda pherdys (shrimps) chili Macaneaidd - un o brydau traddodiadol yr ynys.
Mae'r cyfuniad ma o fwyd Chineaidd a Phortiwgeaidd yn wych gyda tumeric, llaeth cnau coco, sinamon a balicho yn creu blas ac aroglau â fyddai'n demtasiwn i unrhyw un.
Mmmmmm!
Gyda'n stumogau mor llawn roedd yn rhaid cerdded bant rai o'r calorïau felly ffwrdd â ni o gwmpas y dre gan ymweld â rhai o'r hen adeiladau yn cynnwys yr eglwys gadeiriol a rhai o'r hen amgueddfeydd.
Diolch i'r drefn, roeddwn wedi blino'n swps ac mewn byd arall ar yr heidroffoil yn breuddwydio am y tro nesa y byddwn yn ymweld â Macau.
Lle delfrydol i ymweld ag ef pan fyddaf yn hiraethu am Ewrop!
|
|
