´óÏó´«Ã½

Unwaith eto roedd caffi Just Because yn orlawn ddydd Mawrth 5 Mai - mae'n amlwg nawr bod cael pryd a chlonc yma ar ddydd Mawrth cynta bob mis yn denu nifer o ddysgwyr.

Roedd dau ddigwyddiad newydd hefyd gyda ni yn ystod y mis diwetha. Ddydd Iau 30 Ebrill sefydlwyd clwb darllen safon Canolradd/Uwch yn llyfrgell Coed Parc, Penybont dan arweiniad Geoff Fisher, llyfrgellydd Abercynffig. Roedd saith wedi dod i'r cyfarfod cynta a gobeithio bydd hwn yn mynd o nerth i nerth ac yn gyfle i siarad a thrafod yn ogystal â darllen nofelau cyfoes. Bydd hwn yn cwrdd bob pythefnos yn rheolaidd.

Ddydd Gwener 1af o Fai daeth pymtheg o ddysgwyr i Amgueddfa ac Oriel Cwm Cynon yn Aberdâr am Baned a Chlonc. Mae dysgwyr yr ardal wedi bod yn gofyn ers tro am weithgaredd anffurfiol yn yr ardal ac roedd yn hyfryd gweld cymaint wedi taro draw. Bydd hwn yn ddigwyddiad misol nawr ar y prynhawn Gwener cynta ym mhob mis.

Ddydd Sadwrn 9 Mai cafwyd taith gerdded lwyddiannus iawn dan arweiniad Alex Marshal yn ardal Pen y Fai, ar gyrion Penybont.

Yr un penwythnos aeth grŵp ohonon ni i wersyll Glanllyn ac er gwaetha'r tywydd llwyddwyd i gael amser pleserus a phrysur iawn gan ddechrau gyda thaith mewn cwch ar draws llyn Tegid brynhawn Gwener yn y gwynt a'r glaw.

Ddydd Sadwrn y 9fed o Fai roedd rownd gynta cystadleuaeth Dysgwr y Flwyddyn Eisteddfod Genedlaethol y Bala yn cael ei chynnal yn Nolgellau. Roedd dau o ddysgwyr Morgannwg yn cystadlu ac roedd pwyllgor Dysgwyr yr Eisteddfod wedi trefnu nifer o weithgareddau yn y dref yn ystod y dydd. Aethon ni ar daith gerdded o amgylch Dolgellau, i weithdy telyn diddorol yn NhÅ· Siamas yn y dre ac fe gawson ni gyfle i ganu a dawnsio gwerin cyn dychwelyd i Lanllyn ar ddiwedd y dydd.

Ar ôl swper blasus aethon ni draw i Lanuwchllyn i gael ychydig o hanes O.M. Edwards, a gweld Coed y Pry ei gartre cyn mynd am ddiod i dafarn yr Eryrod.

Ar ôl bore o weithgareddau yng Nglanllyn fore dydd Sul roedd yn bryd dechrau'r daith adref.