 |
 |
Nadolig ym Mrwsel
Sian Elin Dafydd yn ysgrifennu o Frwsel lle mae hi a'i theulu yn awr yn byw - ac yn paratoi ar gyfer y Nadolig
Dydd Llun, Rhagfyr 24, 2001
|
Pryder y plant
Mae'n rhaid chwerthin wrth weld y ddwy fach yn mynd drwy eu pethau - yn cyfansoddi rhestrau maith ac yna'n addasu llythyrau at Siôn Corn fel is-olygyddion crefftus - wrth weld teganau mwy deniadol yn cael eu hysbysebu ar y teledu!
Nawr mae'r cwestiynau yn cael eu saethu un ar ôl y llall:
- Ydi Santa yn mynd i gofio ein bod ni yn aros ym Mrwsel eleni dros y Dolig?
- Beth os bydd yr anrhegion yn mynd i Gaerdydd ar ddamwain?
- Ydi Santa yn mynd yn rhy hen i wneud yr holl deithio yma
Mae'n siwr mai hon fydd y flwyddyn ola' o gredu'n llwyr yn y bod mawr coch gan fod yr hyna' bellach yn saith ac yn cyrraedd oed yr anghredadun!
Perfformiad dramatig
Fel rhiant i blant ifanc mae'r Dolig yn gyfle i weld o leia' un perfformiad dramatig iawn sy'n llawn angylion, ambell Siôn Corn, a charw neu ddau.
Eleni, er embaras mawr iddi roedd yr hyna' yn anrheg Dolig, yn gwisgo bocs cardbord lliwgar ar ei phen a llwyddodd i guddio yn y cefn gyda gweddill ei dosbarth pendrwm.
Un o gynorthwywyr y prif ddyn oedd yr ifanca' wedi ei gwisgo fel picsi bach coch, ac yn ddigon ciwt i'w rhoi ar goeden Dolig!
Wedi cael eu teganau
Yng Ngwlad Belg mae'r plant bach eisoes wedi derbyn eu teganau ar wyl St Nicolas/St Niklaas ar Rhagfyr 6.
Mae gan y sant gynorthwy-ydd sef bachgen bach du o'r enw Pre Fouettard neu Zwarte Piet ac mae'r ddau yn ymweld' â chartrefi.. Yma ac yn nifer o wledydd eraill Ewrop mae Rhagfyr 24 a 25 yn gyfnod pwysig i'r teulu dreulio amser yng nghwmni ei gilydd ac nid rhoi anrhegion.
Efallai fod yr arferion yma yn fwy cydnaws ag ysbryd yr wyl o gymharu â'r agwedd fasnachol sydd adre.
Yn y Grande Place
Fel arfer ceir lle i sglefrio yng nghanol y Grande Place ond eleni fe'i symudwyd i'r hen farchnad bysgod, Quai aux Briques.
Hefyd yn y sgwâr gothig cynhelir y farchnad Ewropeaidd enwog lle mae holl wledydd yr undeb yn cael stondin i werthu ac arddangos cynnyrch lleol - ond ni fydd hwn yn dechrau tan ar ôl y Dolig, ar Ragfyr 28.
Ym Mrwsel eleni mae golygfa'r geni yng nghanol y Grande Place ac mae popeth ar raddfa go iawn ond y cyfan yn siomedig iawn gyda'r anifeiliaid, hyd yn oed, yn rhai plastig.
Roedd y rhai cig a gwaed wedi creu gormod o lanast yno y llynedd mae'n rhaid!
Pan oedd Iesu yn fachan bach drwg
Ond wrth weld yr olygfa dymhorol yng nghanol y Grande Place daw stori adroddodd mam flynyddoedd yn ôl i'r cof gan roi gwên fawr ar fy wyneb
Yn ystod ei chyfnod fel athrawes yn y Rhondda bu mewn perfformiad o ddrama'r geni mewn ysgol plant gydag anghenion arbennig. Roedd cynghorwyr a phwysigion y cwm yn eistedd yn y rhes flaen yn aros i'r llenni godi.
Aeth y cyfan yn ffantastig - cafodd Mair a Joseff le yn y llety, ganwyd y babi sanctaidd yn ddisymwth ac ymddangosodd y bugeiliaid a'r doethion. Ond aeth pethau ychydig ar chwâl gydag actio byrfyfyr a'r Fair yn anghofio'i llinellau
Yr olygfa: Joseff yn cyrraedd nôl o'r gwaith wedi diwrnod caled iawn
Joseff: "O Mary, I've had such a hard day in work today, I'm so glad to be back with my family. Tell me how has baby Jesus been?"
Mair: "Well Joseph I have to say he's been a right little bugger today, playing up and crying all the bl..dy time."
O enau plant bychain wir!!!!
Joyeux Nol a Bonne Année o Frwsel.
|
|
