´óÏó´«Ã½

Clwb pêl-droed Llangefni oedd y lleoliad ar Orffennaf 22 ar gyfer barbeciw a pherfformiadau gan Papa Gini, band ifanc newydd o Lanfairpwll a rocars bytholwyrdd Bethesda, Celt.

Da yw deall bod Celt yn bwriadu mynd i'r stiwdio i recordio yn yr hydref. Daeth tyrfa dda i'r clwb i fwynhau noson gyda llwyfan yn yr awyr agored.

Cychwynnodd gweithgareddau Gŵyl Cefni ar nos Fawrth, Awst 16, yng Nghlwb Pêl-droed Llangefni gyda gêm rhwng tîm o sêr radio a theledu a thîm ieuenctid Llangefni. Roedd tîm y sêr dan ofal y rheolwr enwog Arthur Picton. Yn gwmni iddo roedd George Huws. Daeth George ymlaen fel eilydd yn yr ail hanner yn lle Kev Bach Champion a sgorio gyda chic o'r smotyn i sicrhau gêm gyfartal. Mae Pwyllgor Gŵyl Cefni yn ddiolchgar iawn i swyddogion y Clwb Pêl-droed am eu cydweithrediad dros y ddwy noson ac edrychwn ymlaen at gyd weithio eto yn y dyfodol.

Noson gomedi gyda Tudur Owen, Bedwyr Rees, Beth Angell, Parri'r Barman a Ffarmwr Ffowc a gafwyd yng Nghlwb Wellmans, Llangefni, nos Iau, Awst 18. Roedd y clwb dan ei sang a phawb yn eu dyblau gyda sioe newydd y digrifwyr. Gobeithiwn ymweld eto â Chlwb Wellmans yng Ngŵyl Cefni 2006.

Daeth yr ŵyl i uchafbwynt ym Mhafiliwn Sioe Môn ar nos Wener a nos Sadwrn gyda pherfformiadau arbennig gan 1 Sain, Mojo, John ac Alun, Anhysbys, Vanta, Sara Mai a'r Moniars, Elin Fflur a Bryn Fôn a'r Band. Profiad arbennig oedd gweld cannoedd o freichiau yn yr awyr yn symud i gerddoriaeth y perfformwyr.

Hoffai Pwyllgor Gwaith yr ŵyl ddiolch i Cymunedau'n Gyntaf am nawdd at y digwyddiadau'n arwain at yr ŵyl, i Gyngor Sir Ynys Mon am grant Cronfa'r Degwm ac i'n prif noddwyr unwaith eto eleni, Menter Môn. Diolch arbennig i Siwan Owens a Helen Thomas o Fenter Iaith Môn am bob cymorth gyda gweinyddiaeth a threfniadau'r ŵyl.

Gwyliwch y wasg am fanylion digwyddiadau Gŵyl Cefni yn ystod y misoedd nesaf.