|  |
 |
 Bobi a Sami a Dynion Eraill
Taith newydd yn deyrnged i Wil Sam
Teyrnged i un o ddramodwyr mwyaf diddorol y theatr Gymraeg fydd cynhyrchiad cyntaf Cwmni Theatr Genedlaethol Cymru yn 2009.
Er mai gyda'r cymeriad cegog a lliwgar hwnnw, Ifas y Tryc, y bydd W S Jones - Wil Sam - a fu farw Tachwedd 2007, yn cael ei gysylltu yn bennaf yr oedd hefyd yn ddramodydd ac iddo lais Ewropeaidd yn nhraddodiad mawrion fel Beckett a Pinter.
Yr oedd hefyd yn gwmniwr diddan a difyr ac yn berson llawn hiwmor.
Theatr yr Abswrd
Ond ar drothwy taith o amgylch Cymru a fydd yn deyrnged i'w gyfraniad i fyd y ddrama Gymraeg dywedodd llefarydd ar ran y Theatr Genedlaethol:
"Er bod cymeriadau cofiadwy y dramodydd o Eifionydd, William Samuel Jones (WS Jones neu Wil Sam), yn rhai Gymraeg a Chymreig o ran iaith ac anian, y mae nhw hefyd yn perthyn i steil o ysgrifennu sydd â chyd-destun Ewropeaidd iddo."
Daeth Wil Sam dan ddylanwad Theatr yr Abswrd a ddatblygwyd gan ddramodwyr byd enwog fel Harold Pinter, Eugene Ionesco a Samuel Beckett yn ystod ail hanner yr Ugeinfed Ganrif.
Theatr sy'n fath ar gomedi ond sy'n gymysg ag elfennau trasig gyda'r cymeriadau wedi'u caethiwo mewn sefyllfaoedd anobeithiol ac yn cael eu gorfodi i ailadrodd ac ail-wneud yr un pethau gan ddefnyddio deialog sy'n llawn ystrydebau a chwarae ar eiriau.
"Roedd Wil Sam yntau'n feistr ar y math yma o ysgrifennu," meddai Cyfarwyddwr Artistig Theatr Genedlaethol Cymru, Cefin Roberts.
"Gan ei osod yn solet gyda'r dramodwyr enwog eraill yng nghanol traddodiad Theatr yr Abswrd," ychwanegodd.
Enghraifft orau
Dywedir mai un o'r enghreifftiau gorau o'r math yma o ddrama gan Wil Sam yw Bobi a Sami y bydd y Theatr genedlaethol yn teithio a hi o amgylch Cymru yn ystod Chwefror a Mawrth dan y teitl Bobi a Sami...a Dynion Eraill.
Yr actorion fydd Llŷr Evans, Sion Pritchard a Llion Williams ac yn ogystal â pherfformio Bobi a Sami ei hun bydd y tri hefyd yn llwyfannu monolog newydd sbon gan Luned Emyr, Meical ynghyd â dwy ddrama heb eiriau gan Samuel Beckett.
Gwerthfawrogi a deall
"Ein nod yw ceisio gwerthfawrogi a deall y dylanwadau fu ar waith Wil Sam," eglurodd Cefin Roberts sy'n cyd gyfarwyddo'r cynhyrchiad gyda Judith Roberts.
"Dyma gyfle Theatr Genedlaethol Cymru i anrhydeddu mawredd y dramodydd nodedig hwn a'i gyfraniad i fyd y ddrama Gymraeg," meddai.
Cynllunwyd y set ar gyfer y cyhyrhciad gan ŵyr WS Jones, Gwyn Eiddior Parry, a chyfannsoddwyr y gerddoriaeth gan aelod o'r grŵp Sibrydion. Nick Mumford sy'n gyfrifol am y goleuo.
Y daith
Bydd y daith yn cychwyn yn Y Llwyfan, Caerfyrddin (01267 233882) nosweithiau Mercher, Iau a Gwener, Chwefror 11-13, 2009 gan ymweld wedyn â:
• Mawrth, Mercher, Iau a Gwener, Chwefror 17-20.
• Theatr y Gromlech, Crymych (01239 831455). Mawrth a Mercher, Chwefror 24-25.
• Sadwrn, Chwefror 28.
• Mawrth a Mercher, Mawrth 3-4.
• Gwener a Sadwrn, Mawrth 6-7 Mawrth.
• Neuadd Goffa, Cricieth (01766 522491) Mawrth a Mercher, Mawrth 10-11.
• Gwener a Sadwrn, Mawrth 13-14.
Oherwydd ffurf y seddi cyfyngir y cynulleidfaoedd i 120 ym mhob perfformiad.
Cysylltiadau Perthnasol
|
|
|
|
Yr Eisteddfod 