O ddechrau'r Gwanwyn yn y flwyddyn 1991 daeth criw Cerddwyr Edeyrnion at ei gilydd i droedio llwybrau Edeyrnion, ac rydym wedi crwydro gwahanol ardaloedd hefyd, y mynyddoedd a'r arfordir - rhai pell ac agos.
Erbyn hyn rydym hefyd yn trefnu penwythnosau cerdded.
Teulu clos o 60 o wÅ·r, gwragedd a phlant ydym - yn Gymry, Saeson, ac ambell i ddysgwr (yn falch o'r cyfle i ymarfer yr iaith).
Cyn ymuno ag unrhyw glwb cerdded mae'n hynod bwysig fod gennych esgidiau cerdded cryf, gyda dillad glaw, dillad cynnes, diod a phecyn bwyd a man bethau eraill i'w rhoi mewn pac ar eich cefn, ac mae'r hen ffon wrth gwrs yn help mawr bob amser.
Un o'r teithiau wnaethom mis Ionawr eleni, dan arweiniad Mr Len Harrison, Siambar Wen, oedd i Ben Foel.
Aeth 27 ohonom ar y daith ac wyth arall yn dewis taith mwy hamddenol o Gorwen, ar hyd yr hen reilffordd, i Gynwyd ac ymlaen i Siambar Wen.
Cychwynnodd y 27 ohonom o fuarth Siambar Wen, dringo ar i fyny am Blaengwnodl Ucha, cartref y diweddar Athro Syr Rees Davies.
Dal i ddringo tuag at Ben Foel, mewn tywydd braf a'r camerâu yn brysur iawn yn ceisio cofnodi'r golygfeydd clir hyfryd. Diod bach ar y copa, ac yna i lawr am ffordd Sarn Helen, ac ymlaen i'r man rhamantus - Llyn Mynyllod ar yr ucheldir rhwng Cynwyd, Llandrillo, a Glanrafon.
Seibiant yma i fwynhau y pecyn bwyd, sydd bob amser yn blasu'n dda yn yr awyr iach.
Yn ôl i Ffordd Sarn Helen a chychwyn dros fynydd Mynyllod i lawr am goedydd Branas i ffordd top Branas Lodge a dilyn y ffordd heibio Tyfos yn ôl i Siambar Wen.
Wedi cyrraedd Siambar Wen roedd 'ne sypreis yn aros un o aelodau ffyddlonaf y Clwb, sef Rhys 'y sweep'.
Roedd yn dathlu ei ben-blwydd yn ddeugain oed, ac roeddem wedi trefnu parti bach iddo. Pawb yn mwynhau'r wledd a'r dathlu. Diolch i Mr Len Harrison am arwain y daith.
Mae croeso cynnes i unrhyw un ymuno â'r criw i droedio a dringo llethrau gwahanol ardaloedd.
Rydym yn trefnu teithiau noddedig at wahanol elusennau, ac erbyn hyn mae'r Clwb wedi codi ambell i fil o bunnoedd at achosion da.
Ym mis Medi bydd ein pererindod blynyddol yn mynd i Eglwys hynafol y Santes Melangell, ac wedi cyrraedd byddwn yn cael gwasanaeth byr cyn troi am adref.
Gan Annie Jones, Cynwyd.
Ìý
