´óÏó´«Ã½

Mae hwn yn fudiad gwirfoddol, di-blaid, wedi ei sefydlu yn 2004 i goffáu chwe chan mlwyddiant Senedd Machynlleth. Ei amcan yw ailagor y Senedd fel fforwm ddemocrataidd barhaol a fydd yn dylanwadu ar lywodraeth yng Nghymru. Mae'n credu y gellir gwneud hyn yn gyfansoddiadol ar sail y cynghorau cymuned. Y mae bellach wedi anfon amlinelliad byr o'i syniadau at bob cyngor bro a thref yng Nghymru ac wedi gwahodd eu hymateb cychwynnol.

Cadeiriwyd y cyfarfod gan y Cynghorydd Dilwyn Jones, a chyflwynwyd papur trafod gan y Parchedig Tegid Roberts, cadeirydd Senedd '04. Gofynnwyd nifer o gwestiynau pwrpasol, ac yr oedd teimlad o'r ddeutu iddi fod yn drafodaeth fuddiol. Gall y cynghorwyr a oedd yn bresennol yn awr adrodd yn ôl wrth eu cynghorau; gobeithia mudiad Senedd '04 y bydd hyn yn estyn y drafodaeth ac yn arwain yn y pendraw at wireddu ei amcan o ailagor Senedd Glyndwr yn ei safle hanesyddol.

Yr oedd y ddirprwyaeth yn gallu adrodd am ymateb calonogol iawn i'r llythyr, o drefi ac ardaloedd amrywiol drwy hyd a lled Cymru. Ymhlith y cynghorau sydd wedi mynegi diddordeb rhestrwyd: Rhuthun, Caergybi, Hwlffordd, Porthmadog, Caerfyrddin, Llanbradach, Trefyclo, Glyn Nedd, Caernarfon, Dinbych-y-pysgod, Pwllheli, Llanberis ynghyd â nifer o rai eraill. Mae pum cyngor yng ngogledd Meirionnydd eisoes wedi ymateb yn gadarnhaol sef Penrhyndeudraeth, Llanfrothen, Trawsfynydd, Llanbedr a Llanelltyd. Os daw plwyfi Penllyn, ac un neu ddau arall, mae bron yn sicr y bydd cynrychiolaeth i Feirionnydd yn Senedd Machynlleth pan ddaw dydd ei hagor.

Mae Senedd '04 hefyd am bwysleisio, pan fydd yn sôn am Feirionnydd fel etholaeth gyfer y Senedd, ei fod yn golygu'r Feirionnydd hanesyddol a thraddodiadol, yn cynnwys Edeirnion.

Penderfyniad Senedd '04 yw symud ymlaen, os oes modd yn y byd, drwy ddealltwriaeth a'r corff Un Llais Cymru, sydd bellach yn cynrychioli mwyafrif mawr y cynghorau bro a thref. Ysgrifennwyd yn ffurfiol at brif weithredwr Un Llais yn gofyn dau beth: (a) a yw Un Llais yn gweld sail i drafodaeth yn syniadau Senedd '04? (b) a fyddai Un Llais yn ystyried sefydlu gweithgor ar y cyd gyda Senedd '04 i lunio cynigion manwl i'w gosod gerbron yr holl gynghorau? Yr hyn yr oedd Senedd '04 yn ei ofyn yn arbennig gan y cynghorwyr oedd iddynt arfer eu dylanwad o fewn Un Llais i ofalu fod y drafodaeth hon yn parhau ac yn ymestyn.