|
Cafodd siop cigydd ET Jones a'i Feibion a'i Ferch - neu Lamia, fel mae'n cael ei adnabod yn lleol - ei hanrhydeddu fel Siop Cig Gorau Cymru mewn cystadleuaeth a drefnwyd gan Hybu Cig Cymru a Chylchgrawn y Meat Trades Journal.
Mae Lamia wedi ennill sawl gwobr dros y blynyddoedd ond dyma'r tro cyntaf iddyn nhw gael eu hanrhydeddu fel y gorau yng Nghymru mewn seremoni wobrwyo yng Ngwesty Claridge's, Llundain, yn ddiweddar.
"Mae'n anrhydedd anferth i ni a 'da ni'n falch iawn," meddai Ifan Jones, sydd yn rhedeg y busnes ynghyd a'i chwaer, Elen, a'i frawd Richard.
Mae ffenest y siop ym Modedern yn dyst i ragoriaeth y busnes gan ei bod yn orlawn o dlysau a thystysgrifau.
"'Da ni 'di ennill sawl gwobr dros y blynyddoedd," ychwanegodd Ifan. "Ond mae hwn yn arbennig iawn gan ei fod yn wobr trwy Gymru gyfan."
Dechreuwyd y busnes gan Evan Thomas Jones - taid Ifan, Elen a Richard - ym 1915 ac mae elfen deuluol y busnes yr un mor gryf ag erioed gan fod Iwan, mab Ifan, hefyd yn gigydd.
"Mae 'na bedair cenhedlaeth o'r teulu wedi gweithio yn y busnes," meddai Ifan. "Roedd ein tad yn weithgar iawn yn adeiladu'r busnes ac mae Iwan efo ni rŵan.
"Ac mae'r elfen deuluol yna'n bwysig; da ni i gyd yn gweithio fel tîm yma a dyna sy'n gyfrifol am y llwyddiant. Mae hi'n andros o deimlad braf i feddwl ein bod ni wedi ennill y wobr ar gyfer y siop orau yng Nghymru."
 |
Ìý
