Croesawyd yr aelodau i'r cyfarfod gan ein Llywydd, Nan Williams. Anfonwyd ein cofion at ein Llywydd Anrhydeddus, Mari Roberts, gan obeithio y bydd Mari gyda ni y tro nesaf.Aeth Nan ymlaen i gyfeirio at ein colled fel Rhanbarth ym marwolaeth Garmona Roberts, Cangen Llanrwst a fu hefyd yn Ysgrifennydd Rhanbarth weithgar i Nan. Yr oedd Garmona wastad yn barod ei chymwynas ac yn weithgar a doeth ei chyngor yn ei Changen. Estynnwn gydymdeimlad â Seth Roberts, ei gŵr. Hefyd bu i Glenda Williams ein cyn drysorydd golli ei brawd yng nghyfraith. Estynnodd Nan gydymdeimlad i Glenda a'r teulu ac i deuluoedd aelodau a changhennau eraill sydd wedi cael profedigaeth drwy golli aelodau yn ddiweddar.
Yr oedd yn braf cael deall fod Noson Chwaraeon y Rhanbarth yn Eglwys Bach wedi bod yn llwyddiant unwaith eto. Diolchodd Nan i'r Pwyllgor Chwaraeon am drefnu'r noson, ac yn absenoldeb Rhiannon Parry diolchodd Nan ar ran y Pwyllgor Chwaraeon i bob Cangen fu yn cystadlu a rhoi raffl, i gangen Betws y Coed am drefnu paned, ac i'r ddau ddyn dewr, sef Wil a Dewi am gadw trefn ar y noson. Llongyfarchodd gangen Cyffordd Llandudno am ddod yn gyntaf gyda dartiau, cangen Llanrwst am ddod yn gyntaf gyda Dominos a changen Betws y Coed am ddod yn gyntaf gyda Chwist. Y gobaith ydi fod y timau yn fodlon mynd i Fachynlleth i gynrychioli'r Rhanbarth yn y Gemau Cenedlaethol ar yr 20fed o Fai. Bydd arian ar gael at y costau teithio ac at gostau cofrestru.
Yn absenoldeb Helga Martin o'r Pwyllgor Iaith a Gofal, darllenwyd adroddiad yn diolch i'r canghennau a roddodd raffl ac a fu'n helpu gyda Diwrnod y Dysgwyr yng Nghonwy ym mis Chwefror eleni. Unwaith eto cafwyd diwrnod llwyddiannus iawn gyda 80 o bobl yn dysgu neu'n ceisio gwella eu gafael ar yr iaith Gymraeg a 14 yn cael eu hyfforddi fel athrawon ail iaith gan Eleyn Hughes o Brifysgol Bangor.
Rhoddwyd adroddiad gan Myfanwy Roberts o'r Pwyllgor Gŵyl a Hamdden yn dweud fod trefniadau yn mynd ymlaen ar gyfer y Ffair Haf yn Nhalybont ar nos Iau Mehefin 15fed. Mae poster, a thocynnau i'w gwerthu, wedi eu hanfon at bob Cangen a bydd ymarfer i rai sydd yn arddangos gwisgoedd priodas ar nos Fercher Mehefin 7fed yn Neuadd Talybont am 7.15 gyda Maureen Hughes ac Eira Jones. Mae pob cangen eisoes yn gwybod beth i werthu ar eu stondin.
Bydd manylion y noson ac adroddiad llawn o'r pwyllgor yn mynd i bob cangen gyda chofnodion Pwyllgor Rhanbarth mis Ebrill.
Mynegodd ein Llywydd bryder fod gennym ddim Ysgrifennydd, Is-Lywydd, Is-Ysgrifennydd nac Is-Drysorydd Rhanbarth ar gyfer mis Medi eleni.
Rhoddwyd gwybodaeth am yr Ŵyl Haf ym Machynlleth a gynhelir ar Fai 20fed i'r aelodau. Dai Jones Llanilar fydd y Gŵr Gwadd yn y Cyfarfod Blynyddol a Dr Dai Lloyd fydd y Gŵr Gwadd yn yr Ŵyl Haf Iechyd a Ffitrwydd. Mae'r manylion gan y canghennau.
Dylai unrhyw rai sydd yn bwriadu cystadlu yn Sioe Frenhinol Amaethyddol Llanelwedd roi eu henwau i Ann Jones Ysgrifennydd y Pwyllgor Gŵyl a Hamdden (01492 660 291) neu i Myfanwy Roberts (01492 640 939) erbyn Mai 15fed. Manylion y cystadlaethau gan y canghennau.
Mae Penwythnos Preswyl Llanbedr Pont Steffan yn brysur lenwi. Enwau a blaendal o £50 i Aberystwyth ar ffurflen arbennig i'w chael gan ysgrifennydd y gangen cyn gynted ag sydd bosibl.
Bydd tâl aelodaeth yn codi i £12.50 o fis Medi ymlaen.
Bydd teithiau cerdded i Gymry Cymraeg a dysgwyr yn cael eu trefnu gan Emlyn Thomas ar gyfer y Gwanwyn. Am fwy o wybodaeth ffoniwch 01492642 043.
Gofynnwyd i bob cangen holi a fyddai un neu ddwy aelod yn fodlon cyfieithu ychydig i Hospis Dewi Sant. Bydd rota yn cael ei threfnu yn y Rhanbarth. Manylion y rhai sydd yn fodlon gwneud i'r Ysgrifennydd Rhanbarth.
Cytunwyd mai o hyn ymlaen bydd gwybodaeth
yn cael ei gynnwys pan fydd y canghennau yn tapio'r Pentan a bydd gwahoddiad yn mynd allan i ganghennau Bae Colwyn a Hen Golwyn i fod yn rhan o'r rota gyda'r tapio,
Yr oedd pryder ynglŷn a'r bwriad i ail drefnu ysbytai Gogledd Cymru gan fod y bwriad i israddio Ysbyty Llandudno yn mynd i achosi problemau i drigolion Dyffryn Conwy, bod problemau parcio i'r staff a'r ymwelwyr eisoes yn bodoli yn Ysbyty Gwynedd ac Ysbyty Glan Clwyd a bod cau Ysbyty Abergele yn mynd i achosi problemau i'r holl ardal. Gofynnwyd i'r aelodau fynd â gwybodaeth yn ôl i'r canghennau am lyfryn sydd ar gael yn ymwneud ag ail drefnu ysbytai Gogledd Cymru a chyfle iddynt fynegi eu barn pe byddent yn ffonio 01978 727871 a gofyn am y llyfryn 'Chi a'ch Gwasanaeth Iechyd'.
Ìý
